25、Dawz Ndei Bakdou Baihnamz Guek Raeuz

Gvangjsih dwg aen bakdou baihnamz guekcoj ndeu, baihnamz miz 1595 goengleix sienqhaenzhaij, saenamz caeuq Yeznanz doxrangh ndaej 1020 goengleix. Gvangjsih Bouxcuengh Swcigih giem miz haij dieg mbwn sam yiengh henzre, youq hong ginhsw gwnzde miz gij diegvih canloz daegbied.

Veiz Gozcingh cawjguenj Gvangjsih seizde, guek raeuz cingq doiq Daizvanh yaek “fanj gung daluz” caeuq Meijgoz daj baihnamz ciemq- haeuj guek raeuz gij hangzhaep ginhsw neix. Veiz Gozcingh dwg boux goengdaeuz ceiq hung dangj cwng ginh swcigih ndeu, dawz ndei bakdou baihnamz guekcoj cix dwg hangh hongnaek de lo.

Bi 1962, Daizvanh youq Meijgoz dingjrengz caeuq dajheiq lajde, hozgyaenj dangqmaz, yaemmaeuz ciemqhah gij dieg henzhaij raeuz, dauqcungz duet aeu gij “diendangz” gyoengqde deng vut haenx. Doiq dingz hingzsi neix, Veiz Gozcingh daiqlingx gij goengdaeuz gaemhong Gvangjsih Ginhgih caeuq gij goengdaeuz dieg- fueng, naengh feihgih humx seiqhenz Gvangjsih mbin le geij hop, cazyawj dieghingz. De caeuq boux ginhgih swhlingyenz Ouh Cifu naeuz: “Gvangjsih dieghingz fukcab, seiz gozminzdangj dwkbaih le deuz bae Daizvanh, haujlai binglw caeuq dwzvu louz roengzdaeuj gvaq, gizneix dwg aen muzbyauh youqgaenj gyoengqde daeuj famh ndeu, raeuz itdingh yaek bwh hong ndei bae.” De caeuq gij goengdaeuz dangj cwng ginh swcigih haenx lai baez ngeixyaeng, cingsim baijbouh, gyagiengz bing minz lienzfuengz, seizseiz yaek dingjhoenx vunzdig mauhyiemj daeuj ciemq. Gijneix doiq faenjsoiq gij yaemmaeuz Daizvanh gig miz cozyung.

Daj bi 1964 hwnj, Meijgoz hoenx Yeznanz yied ngoenz yied haenq, de caq gij dieg baihbaek Yeznanz gonq, liux le youh cigsoh okbing. Gij feihgih Meijgoz lij goengyienz haeujciemq rangh gwnzmbwn 、Yinz- nanz caeuq Haijnanz guek raeuz. Youq guekgya ancienz souh hangz yiemzcungq le, cunghyangh haucau daengx guek bing minz gyagiengz bwhhoenx, seizseiz bae dingj Meijgoz daeuj hangz.

(caengz sat)