(Ciep geizgonq)

Gij neix, bouxgvan rox youq ndawsim.

Meh Lanz youq yihyen ndwen ndeu couh okyen. Ma daengz ndaw ranz, meh Lanz lij son bouxgvan hag guh hongranz. Gvan cawj haeux, meh Lanz youq henz yawj de coh rek dem raemx, dem geij lai raemx, cuengq geij lai haeux, haeux cawj daengz baenzlawz yiengh cij ndei gwn, meh Lanz cungj naeuz hawj gvan. Meh Lanz lumj boux lauxsae son hagseng iq nei, naihsim saeqsim son de cauj byaek, swiq buh, moix ngoenz lij cungj daezsingj de gwn yw……

Cawjgwn、swiq buh, hag ndaej ca mbouj geijlai lo, hoeng gwn yw saeh neix gvan cungj mbouj geiq ndaej. Boux baenz binghdangzniu aeu ciuqseiz gwn haeux gwn yw, ciuqseiz dajcim dem. Bouxgvan geiq fwen baenzneix ak, baenzlawz doiq yw binghdangzniu youh lumz ndaej gaxlaih ngaih ne?

Meh Lanz siengj, gou vanzlij caengz ndaej dai ha!

Gyanghaemh, goenglaux ninz youq henzndang meh Lanz, cingznaek naeuz: “Gizsaed, cawj haeux swiq buh gou caeux hag ndaej rox lo, doiq binghdangzniu gou goj rox baenzlawz yw. Hoeng gou siengj, mwngz cungj gvaqniemh gou, couh mbouj liz gou. Youq ndawmbanj gou, miz aen goj baenzneix ndeu: Miz doiq beixnuengx ndeu, bohmeh dai caeux, daegnuengx cij ndaej 3 bi, song beixnuengx baenzlawz cij gvaq ndaej ciuhvunz ha! Doeklaeng, ngamq ndaej 10 bi, daeggo cij baenz loh bingh gvaiq ndeu, canghyw naeuz, daeggo baenz bingh neix, hojnaengz seizseiz fwt dai bae. Daeggo vih hawj daegnuengx miz baengh, moix ngoenz youq ndaw sim doiq swhgeij naeuz, hawj gou lai lix ngoenz ndeu, daegnuengx couh ndaej baengh lai ngoenz. De moix ngoenz ninz ndiu hwnq daeuj, couh danq naeuz, daegnuengx youh maj hung ngoenz ndeu. Couh baenzneix, moix ngoenz damzgangj, daegnuengx gaenq ndaej 18 bi, daeggo swhgeij gingqyienz daengz 18 bi mbouj dai. Neix dwg daeggo gvaqniemh daeg- nuengx, cij ndaej lix roengzdaeuj. Dungzyiengh, gou hix muengh mwngz ciengxlwenx gvaqniemh gou, ciengx- lwenx mbouj liz gou……”

Meh Lanz haenh naeuz: “Daeggo neix caen hungmbwk ha! ”

Goenglaux riunyumnyum mbouj dapvah.

Saedceih, youq geij bi gaxgonq, goenglaux daiq meh Lanz bae yihyen yawj bingh seiz, couh raen miz vwndiz lo. Vih mbouj hawj meh Lanz yousim, goenglaux mbouj hawj de rox bingh. Daengz seizneix, goenglaux lij cang roengzbae, cijaeu meh Lanz ndaej lix roengzdaeuj.

Seiqgyaiq caen miz baenzneix geizcik, meh Lanz aenvih gvaqniemh bouxgvan, de gingqyienz ngauz gvaq liux 30 ngoenz yawh dai haenx. It aen 30 ngoenz, youh it aen 30 ngoenz, hajcib aen 30 ngoenz gvaqbae lo, aenmbwn hawj meh Lanz lix roengz- daeuj!

Ngoenz ndeu banhaemh, ndit banhaemh ciuq roengzdaeuj hoengz- fwdfwd, meh Lanz caeuq bouxgvan byaij youq ndawgyang benq dieg byaekvahenj henjrwgrwg ndeu. Meh Lanz sawqmwh cam bouxgvan naeuz: “Gou gig siengj bae mbanj mwngz yawj mwngz gangj boux daeggo haenx!”

Goenglaux nyengrwz mbat ndeu, sikhaek youh riuhaha:“Gyae youq henzmbwn, gyawj youq doiqnaj.”

Meh Lanz dingq le sikhaek roxnyinh:“A, yienzlaiz, duzyou ndaw- sim gou dwg mwngz ha!”

Seizneix, gwnzmbwn gaiqreih byaekvahenj rwenz hwnj singriu angqyangz song bouxlaux neix……

Neix cingq dwg:

Doiq fwen hawj vunz byaij doengzcaez

hawj vunz ndaej naihsouh

Baenzneix gvanbaz miz geij boux

Dieg Cuengh goj ndei gangj mbouj caez.

(sat)

Gvaqniemh