It、Caemxndang.

Haetcaeux caemxndang itbuen vunz guek raeuz caengz sibgvenq, hoeng, haetcaeux caemxndang saedcaih ndaej coi lwed lae baedauq engq hoengh, ndaej diuzciet simcingz, hawj cingsaenz engq baumuenx.

Ngeih、Okhaex.

Itbuen wngdang guh baenz haetcaeux okhaex cungj sibgvenq neix, guh ndei le daengx ciuh miz ik. Danghnaeuz caengz sibgvenq hix mbouj youqgaenj, aeu roengzrengz bae beizyangj, lumjbaenz lai gwn di gijgwn nyinzsei lai haenx, lumj byaekhau、maenzhau daengj haeuxco, mboujguenj haetcaeux siengj bae mbouj siengj bae diengzhaex, nanz le couh gag ndaemqhaex lo.

Sam、Menhmenh Hwnqmbonq.

Raemhrwnh hwnqmbonq, rox hawj lwed cung doxhwnj, cauhbaenz hezyaz sawqmwh bienqdoengh, yinxhwnj gyaeuj ngunh daengj binghyiengh. Ceiq ndei dwg hai da le, lij ninz youq gwnz mbonq hozdung seiq genga caeuq aen’gyaeuj yaep ndeu, gvaq 5 faen cung caiq hwnqdaeuj.

Seiq、Ndoet Boi Raemxgoenj Gyoet Ndeu.

Ninz hwnz he le, ndang vunz yungzheih duetraemx, ndoet boi raemxgoenj gyoet he ndaej boujcung raemx ndaw ndang, cingleix dungxsaej, caemh ndaej cing bak, bangcoh mwngz daj ndaw ninz ndiusingj gvaqdaeuj. Gyanghaemh mwh yaek haeujninz seiz ndaej aeu boi raemxgoenj gyoet he cuengq gyaeujmbonq, yawhbienh haet daihngeih yaek hwnqmbonq seiz ndoetgwn.