Seizhah dwg aen geiqciet nengz- bingh sanjlah ceiq hoengh, baez mbouj siujsim couh yungzheih yinxhwnj baenz cangzyenz roxnaeuz veiyenz. Habdangq gwn boi raemxhing ndeu, roxnaeuz aeu hing cimq caz gwn, ndang vunz couh ndaej yawh- fuengz nengzbingh ciemq haeuj.

Fuengfap gwn hing gig lai, ndaej baek baenz raemxhing gwn, hix ndaej dwk hing cawj cuk gwn. Danhseih miz geij diemj aeu haeujsim:

1、Daiq naeng itheij gwn. Mbangj vunz gwn hing haengj gvet naeng bae, cijdan gwn nohhing de, gizsaed yienghneix gwn gig mbouj ndei, mbouj ndaej cungfaen fazveih gij goengyauq hing okdaeuj. Doengciengz dwg swiq hing seuq le couh cigciep ronq baenz sei roxnaeuz ronq baenz gep gwn.

2、Boux baenz feiyenz geih gwn hing. Hing mbouj dwg vunzvunz gwn ndaej, boux yaem haw huj hoeng、boux da hoengz ndaw ndat caemh mbouj ndaej gwn hing. Linghvaih, boux baenz feigezhwz、boux baenz danjnangzyenz、boux baenz sinyenz、boux baenz dungx biux naeuh、boux baenz binghnyouhdangz、boux baenz baezhangx caemh mbouj hab ciengz- geiz gwn hing.

3、Hing naeuh gwn mbouj ndaej. Hing baez naeuh le couh rox canjseng cungj huqdoeg ndeu, gwn cungj hing neix le rox hawj aen’daep baenz aiz caeuq saihoz baenz aiz.

4、Giuj gwn raemxdangz- hing. Raemxdangzhing cijdan hab boux baenz rumznit dwgliengz rox- naeuz boux deng fwn rwed le buenx miz fatndat roxnaeuz dungx caep gwn, boux baenz rumzndat dwgliengz caeuq hwngqndat dwgliengz mbouj hab gwn, hix mbouj ndaej yw fatsa. Linghvaih, hingndip ndaej dawz daeuj yw boux deng nit rueg ok haenx.

5、Hing mbouj dwg gwn yied lai yied ndei. Seizhah aenvih mbwn ndat, vunzraeuz ciengz gamjdaengz bak sauj、conghhoz in、ok hanh lai, hingndip dwg gijgwn loq ndat, ndigah mbouj hab gwn lai, cijdwg mwh cauj byaek roxnaeuz cawj dang seiz dwk di ndeu couh ndaej.