Mak youq ndaw ndang vunz ndaej baiz huqfeiq caeuq huqdoeg okdaeuj. Mak miz bingh seiz cix gij goengnaengz de deng sonjhaih, daihliengh miz doeg doxgaiq rom youq ndaw ndang, youqgaenj seiz rox baenz binghnyouhdoeg.

Daiqndang ndaej hawj gij binghmak gyanaek, riengzdwk daiqndang ndwensoq demlai, aenmak fudanh hix demriengz gyanaek, youqgaenj seiz goengnaengz mak hawnyieg, saet bae gij goengnaengz baiz huqfeiq baiz huqdoeg haenx. Danghnaeuz baenz binghnyouhdoeg, bouxmeh caeuq lwgndawdungx sengmingh couh miz yung- yiemj.

Mak miz bingh doiq daiqndang yingjyangj gig daih, gipsingq mak yizsenyenz miz fatndat、hwet in、nyouh deih、nyouh gaep daengj binghyiengh, ndaej yinxhwnj lonlwg、seng caeux、lwgndawdungx fazyuz mbouj ndei, sinyenz rox hawj mehdaiqndang hezyaz swng sang, simdaeuz deng sonjhaih, daibuenz bok caeux, cigciep yingjyangj daengz lwg- ndawdungx fazyuz soj aeu yangjgi caeuq yangjliu, caemhcaiq bouxmeh caeuq lwgndawdungx miz sengmingh yungyiemj.

Mehmbwk mak miz bingh ndaej mbouj ndaej daiqndang, neix dwg youz binghmak cungjloih caeuq cingzdoh daeuj dingh, itdingh aeu ginggvaq canghyw genjcaz cijdauj cij ndaej gietdingh. Couhcinj vunzbingh aenmak yaepseiz mboujmiz maz vwndiz, hix aeu youq neigoh、fucanjgoh canghyw yiemzmaed gamhoh lajde doh gvaq daiqndang、senglwg caeuq senglwg le gak aen seizgeiz, gaej gag nyinhnaeuz gamjdaengz gig ndei cix mbouj dingq canghyw nai luenh daiqndang.