Bouxcungnienz caeuq bouxlaux yungzheih baenz mbei gietsig, baenz le aen vwndiz gyoengqvunz aeu gvansim haenx.

Mehmbwk baenz mbei gietsig lai gvaq bouxsai. Ndawde, baenz mbei gietsig cujyau dwg gij mehmbwk fat biz、gij mehmbwk bi’ndwen ndaej 40 bi doxhwnj、gij mehmbwk dingz dawzsaeg haenx. Baenz mbei gietsig, binghleix dwg aenvih habbaenz danj- gucunz nem gijgwn mizgven.

Miz gij banhfap lawz ndaej yw mbei gietsig ne?

Yw mbei gietsig fuengfap haemq lai, danhseih cix mbouj daih ndei geijlai. Conhgyah nyinhnaeuz, baenz mbei gietsig daegbied dwg baenz danjnangzyenz le, wng caenhvaiq guh soujsuz yw ceiq ndei, aenvih seizneix cijmiz yungh soujsuz yw yaugoj ceiq ndei.

Baenzlawz yawhfuengz danjnangz gietsig?

(1) Miz gvilwd gwn haeux(ngoenz sam donq) dwg aen banhfap ceiq ndei yawhfuengz gietsig ndeu, aenvih mbouj gwn seiz raemxmbei ndaw danjnangz ceiq lai, nemmuek danjnangz supsou suijfwn hawj raemxmbei bienq gwd, bop danjgucunz caeuq lonjlinzcij yungzheih habbaenz, raemxmbei couh engq gwd, doeklaeng baenz naezmbei.

Mwh gwn doxgaiq seiz, gijgwn haeuj daengz ndaw cibngeihcijcangz le, ndaej coi danjnangz sousuk, hawj gij raemxmbei gwd caeuq gij raemxmbei hamz miz gij naezmbei haenx baiz ok rog saej daeuj, ndigah ndaej fuengz mbei gietsig.

(2) Hableix senj ndei gwnndoet gezgou, gaej gwn gijgwn danbwz lai、youzlauz lai、gijgwn ndat lai haenx. Habdangq gwn di gijgwn miz nyinzcei doxgaiq lai he daeuj gaijndei danjgucunz baiz ok rog ndang daeuj, fuengz baenz mbei gietsig.

(3) Yenzgiu ndaej rox, danjnangz baenz gietsig miz yizconzsing. Ndigah, ndaw gyog miz vunz baenz gietsig gvaq engq aeu haeujsim hableix gwnndoet. Doengzseiz, conhgyah nyinhnaeuz, fat- yienh bi’ndwen、vunz biz、gijgwn hamz youzlauz lai caeuq hezcij mbouj doengz bingzciengz ciengz rox yaeuhfat baenz mbei gietsig. Conhgyah genyi naeuz, dinghgeiz genjcaz B cauh、genjcaz hezcij, caeux di fatyienh caeux ceihyw.

Gyonj daeuj gangj, baenz mbei gietsig dwg caeuq siuvaq hidungj mizgven, gwn gijgwn yungzheih siuvaq ndaej gemjmbaeu danjnangz fudanh, couh ndaej yawhfuengz mbei gietsig lo.