Gou doiq soqcih “5” daegbied miz gamjcingz. Aenvih ngoenzseng gou couh miz sam aen “5”: 2005 nienz 5 nyied 25 hauh. Aen saedceij neix, hix dwg ngoenz dwgrengz daxmeh.

Ngoenzneix dwg ngoenz- ciet daxmeh, gou siengj hawj daxmeh angq. Gou siengj, daxmeh gyaez gyaeundei, hix gyaez dujva, couh soengq bog vameizgveiq hawj de ba!

Gou fwngz gaem 20 maenz cienzlingzyungh angq- vauvau bae haw lo. Gou byaij haeuj aen diemqva ndeu bae, ya, gij va hoengzhoengz henjhenj lai raixcaix! Gou dauqcawq yawjyawj, boux dajgai cam: “Dahniq, siengj cawx gijmaz ha? Mwngz seizbienh genj ba!” Gou sijsaeq yawj, vameizgveiq miz saekhoengz、 saekmaeq、 saekhau、 saekaeuj daengj, nganzsaek caen mbouj noix ha! Gou sim siengj: Daxmeh bingz- seiz unqswnh son gou baenz- lawz guh vunz, lij dajleix gij gwndaenj gou gig ndei, hawj gou vuenyungz majhung, couh genj saekmaeq ba! Gou youh siengj: Daxmeh gig gyaez gou, gij gyaez daxmeh lumj daihhaij nei laeg, gou baenzlawz lumz ndaej ne? Caiq genj saekaeuj ba! Ngoenz- seng gou miz sam aen “5”, gou couh cawx 15 duj, 6 duj saekmaeq, 9 duj saekaeuj. Gou youq ndaw bogva geb miz mbawq gajben ndeu, gwnz gajben sij dwk:“Daxmeh, gou gyaez mwngz!” Gou gaem bogva angqvauvau ma ranz lo.

Ma daengz bakdou ranz, gou “doek doek doek” roq dou. Daxmeh cam:“Dwg bouxlawz ha!” Gou nyaenj ndaeng dap:“Boux soengq raemx.” Youq daxmeh hai dou yaepyet, bog vameizgveiq gyaeundei yienh youq dangqnaj daxmeh. “Daxmeh ngoenzciet sim- angq!” Gou angq dwk cukhoh daxmeh. Daxmeh youh doeksaet youh angqyangz, gvaq haujlai nanz cij gikdoengh dwk naeuz: “Docih mwngz! Dahlwg gou caen roxsoq!” Gou gotdawz daxmeh naeuz: “Mbouj yungh docih, neix dwg dahlwg wnggai guh.”

Ngoenzneix, aending ranz gou daegbied ronghsag, bog vameizgveiq sawj ndaw ranz rangfwdfwd. Gou caeuq daxmeh miz gangj miz riu, rog cueng duzroeg cici caca angq heuh, youq gwn gofaex diuq bae diuq dauq. Gou sim siengj: Neix itdingh hix dwg gyoengq roeg caez hoh daxmeh ngoenzciet angqyangz ba!

（指导老师：覃珍团）