Ngoenzneix dwg singhgiz roek, mbwn’gvengq raeujrub, gou caeuq daxau baema ranz daxbuz guh yiuzmaenz.

Daxbuz caeux couh bwh ndei maenz biek hawj dou lo. Ma daengz ranz daxbuz, dou gwed faggvak、 fagcanj、daeh maenz biek couh okdou lo.

Dou daeujdaengz giz diegbingz ndeu, couh muengz hwnjdaeuj lo. Dou sien ra ndaek mamh hung iq mbouj ityiengh, yienzhaeuh caep aenyiuz. Gou caeuq dahnuengx daegnuengx caep baenz buenq ngoenz hix caep mbouj baenz aenyiuz. Dou cijndei bae cam daxau, daxau naeuz: “Siengj caep ndei aenyiuz, sien ra di namhndaek song mbiengj cungj bingz haenx baij baihlaj, doq caep doq aet doxhaeuj, doeklaeng itdingh aeu louz aen congh doeng hoenzfeiz.” Dou ciuq daxau gangj bae guh, mbouj yaep ndeu, aenyiuz maemhrem couh caep baenz lo. Dou youh bae ra hazfwnz, ciepdwk couh ndaej coemh yiuz lo. Daxau gangj, feiz itdingh coemh dawzhuhu bae cij ndaej. Gou couh itcig dwk fwnz mbouj dingz. Daih’iek gvaq 40 faen cung le, namhndaek coemh ndaej hoengzfwdfwd lo. Daxau naeuz ndaej dingz feiz lo. Cij raen daxau youq dingj yiuz hai aen congh ndeu, ciep dwk heuh gou daj bakcongh cuengq maenz caeuq biek roengz ndaw yiuz bae, yienzhaeuh gaem fagcanj moeb gij namhndaek coemh ndaej hoengzfwdfwd haenx, aeu namh dub soiq hoemq ndei maenz biek. Daxau gangj aeu 30 lai faen cung, maenz caeuq biek cij cug. Caengz ndaej gwn maenz, gou caeuq dahnuengx couh bae mbaet va’ndoi lo.

Seizgan daengz lo, dou nyouq daengz heiq maenz biek homfwdfwd. Ndaej vat yiuz lo, gou sim’angq raixcaix. Dou hainduj vat yiuz, aenvih gou simgip lai, miz aen maenz ndeu deng gou vat sieng lo, gou cijndei siujsim menhmenh vat. Vat caez le, dou naengh youq gwnz dieg, menh- menh gwn gij maenz gij biek rangfwdfwd haenx. Dou itmienh gwn itmienh gangj riu. Daegnuengx gwn ndaej daengx naj cungj uq maenz, dou haha riu ndaej raemxda cungj lae okdaeuj lo. Daxau raen yienghneix, lienzmuengz yungh soujgih ingj aen- siengq roengzdaeuj.

Daengngoenz roengz bya lo. Dou lumh aendungx gwn ndaej bongqbwt haenx angqvauvau byaij ma ranz lo.

Baez neix coemh yiuzmaenz, gou rox daengz aen dauhleix ndeu: Cijmiz ginggvaq gaenx guhhong, cijndaej miz hoizbauq.

（指导老师：韦彩芳）