“Lauxsaed beij gijmaz cungj youqgaenj.” Gou ceiq gyaez coenz vah neix, aeu coenz vah neix daeuj iugouz swhgeij, seizseiz daezsingj swhgeij.

Geiq ndaej miz baez gaujsi ndeu, daezmoeg mbouj dwg gig hoj, haujlai daezmoeg gou cungj swhgeij guh okdaeuj lo, cijmiz song diuz daez, gou baenzlawz siengj hix siengj mbouj okdaeuj. Cingq dang gou yungh uk ngeix seiz, doengzhag naengh youq baihnaj cingqngamj dawz sigenj daengj hwnj, gij dapanq de gou yawj ndaej cingcing cujcuj, gou mbouj siengj couh dawz dapanq song diuz daez haenx sij hwnjbae lo.

Guh sat daezmoeg le, gou couh lumj mbouj miz saeh ityiengh naengh youq gwnz diegnaengh. “Gyoengq doengzhag, seizgan yaek daengz lo, cingj nyinhcaen genjcaz sigenj,” Lauxsae daezsingj dou naeuz. Gou youh hainduj genjcaz sigenj, dang lwgda yawj daengz song diuz daezmoeg haenx seiz, ndawsim gou couh mbouj onj lo, lumj miz singyaem youq henz rwz gou gangj: “Cingzcik neix bonjlaiz couh mbouj dwg mwngz guh ndaej, mwngz mbouj ndaej aeu, mwngz wnggai lauxsaed.” Cingq youq seizneix, seizgan gaujsi sat lo, gou lienzmuengz dawz dapanq uet bae……

Yienznaeuz baez gaujsi neix gou mbouj ndaej muenxfaen, danhseih ndawsim gou gig angq. Aenvih neix dwg cingzcik caen gou, gou guh daengz le lauxsaed.（指导老师：罗少维）