Seizcou ngoenz singhgiz roek ndeu, gou bae ranz daxdaiq guhcaemz. Ngamq byaij haeuj gyanghongh, gou couh nyouq daengz raq heiqhom he, gou yawj seiqhenz, o, vagut henz ciengz hai lo. Gou sim’angq raixcaix, seizneix, gwnz ndoi itdingh miz haujlai vagut hai lo, hix miz haujlai makndoi cug lo.

Gou doiq biujcej gangj gou siengj bae gwnz ndoi guhcaemz, biujcej raen gou yienghneix angq, couh doengzeiq daiq gou bae gwnz ndoi laeng mbanj guhcaemz. Daxdaiq naeuz:“Seizneix gwnz ndoi miz duzngwz okdaeuj youz, sou aeu siujsim bw!” Dou angq dwk han naeuz:“Dou rox lo, mwngz cuengqsim ba!” Biujcej saeqsing doiq gou naeuz: “Seizneix gwnz ndoi miz cungj makndoi ndeu, lumj naedduh hung, hoengzww, baenz roix baenz roix, geijlai ndei gwn ha! Raeuz bae mbaet ma gwn ba!”

Dou benz daengz gyangndoi, gwnz ndoi hai miz haujlai vagut ndoi, mbawraeu hix bienq hoengz lo, cuengq da yawj bae, gwnz ndoi ndei yawj dangqmaz! Gou cingq yawj dwk, biujcej coi naeuz: “Lij gyaengj gijmaz, vaiq di gvaqdaeuj, gizneix miz haujlai makndoi, vaiq daeuj mbaet lo.” Gou dingq le, gipmuengz buet gvaqbae. Dahraix, ndaw geh go’em miz baenz caz baenz caz makndoi, giet baenz roix baenz roix, geijlai dwggyaez ha! Gou sikhaek mbaet roix ndeu daeuj gwn, caen diemz ha! Mbouj geij nanz, dou couh mbaet ndaej daehgau rim lo. Gou ngiengx gyaeuj uet hanh, fatyienh daeng- ngoenz gaenq roengz bya lo. Gou lij siengj hwnj dingjbya bae youz, biujcej heuh ma ranz lo, gou cijndei sij mbouj ndaej byaij dauqma lo.

Ngoenzneix gou caen sim- angq ha!

（指导老师：覃珍团）