Ngoenzneix lajbyonghngoenz, lauxsae naeuz dou nyi:“Dangz goq daihngeih, ban raeuz gawjhengz bengcag doxdax. Aen siusik sawqmwh gietdingh neix sawj dou gig angq.

Dangz daihgeih youq dou deqmuengh haenx daeujdaengz lo.

Lauxsae daiq dou daengz cauh- cangz bae. Dou baen baenz song aen doih. Vihliux goengbingz, moix doih saimbwk vunzsoq doxdoengz. Lauxsae guh caizbuenq, moix doih miz geij boux hagseng mbwk guh lahlahdui. Cauhcangz cungqgyang cuengq miz diuz cag youh raez youh co he, cungqgyang diuzcag cug miz diuz baengznding he.

Lauxsae youq doxdax gaxgonq gaisau doxdax gvicaek: “Moix aen doih baihnaj miz diuz sienq hau ndeu, baengznding diuzcag cungqgyang haenx hamjgvaq sienqhau doih lawz, doih haenx couh ndaej hingz.”

Gaisau sat gvicaek doxdax, dou couh gak doih ndwn youq mbiengj doih swhgeij, bwh yaek bengcag.

Gyoengq doengzhag bwh ndei le, caizbuenq daihsing hemq:“Yibei!” Song mbiengj cungj gaem ndaet diuzcag.

“Fit——” Singsauq yiengj le, song doih vunz cungj gig yunghrengz rag, siengj rag baengznding daengz mbiengj swhgeij.

Mwngz yawj, boux doengzhag neix, gwnz naj lae baenz naed baenz naed hanh. Lahlahdui gak vih doih swhgeij hemq gyayouz gyayouz.

Mbouj yaep ndeu, baengznding daenq daengz doih wnq bae lo. Ai, doih dou saw lo!

Dou mbouj fug, dou iugouz caiq doxdax baez he. Lauxsae cinj le, dou doxvuenh ciengzdieg. Baez gonq saw dwg aenvih dou mbouj doxgiet, ndigah dou gietdingh youz boux sing hung vih dou hemq gyayouz. Ginggvaq dou caez haenqrengz rag, doih dou ndaej hingz lo. Doiqfueng cijndei danqheiq, nyinhsaw lo.

Daihgya caez ok rengz, bya sang hix senj ndaej. Doih dou ndaej hingz, dwg aenvih dou doxgiet. Cijaeu doxgiet gijmaz saeh cungj guh ndaej baenz.

Baez bengcag doxdax neix hawj gou gig nanzlumz. Gou deqmuengh baezlaeng dou caiq daeuj daxdax bengcag.

(sam nienzgaep Siujyen)