Seizhaenx, de caeuq gij vunzhong henzndang de gamjdanq naeuz: “Hoenx Denbenhfuj mwhhaenx lij mbouj baenzneix fukcab、haemzhoj、dwgrengz.”

Veiz Gozcingh dwg boux vunz- souhhaih “vwnzgwz” ndeu, hoeng de ndaej ndwn okdaeuj guh hong le youh baenz boux vunzhengzguh ndeu. De gangj gvaq di vah mbouj ndei, caemh hengzguh gvaq mbangj cwngcez “cojgingj” seizhaenx.

Couzbei siujcuj laebbaenz le, Guengjsae ok gvaq mbangj anqienq anqloek. Seizhaenx gizcoj swhcauz caeuq vuzcwngfujcujyi lah doh gwnz- biengz, “haenq gung vunzdig gaihgiz” dingz hemqhauh neix hemq ndaej goksasa, baijsingq yied bienq yied naeuh, buenzmienh nanz gaemguenj lai, mbangj dieg lij ok gvaq luenh gaeb、luenh dub、luenh gaj gij saeh rwixyak neix. Swcigih Gwzming Veijyenzvei laebbaenz le, fat gij doengcei gaenjgip gvendaengz sikhaek ceihdingz luenh gaj vunz、luenh gaeb vunz caeuq luenh dub vunz haenx okbae le, cij ndaej yaengyaeng ceihdingz gij saeh de. Mwh guh “daeuq、bae、gaij”, caemh hawj mbangj dungzci ngaiz haih gvaq.

Gvaqlaeng, Veiz Gozcingh caemh caijyungh gvaq mbangj cosih daeuj gaijgez gij vwndiz “vwnzgwz” lw roengzdaeuj haenx, hoeng gaijgez mbouj daengzdaej geijlai. Veiz Gozcingh diuh ok Guengjsae le, dangjveij ndaw gih laebdaeb gaijgez gij vwndiz neix, bi 1983 youh cienmonz cou seizgan okdaeuj cawqleix de.

Bi 1983, Veiz Gozcingh youq Hoih Daih Cibngeih Gaiq Ngeih Cung Cienzhoih aendangj raeuz gwnzde, aenvih gij hong seizhaenx, de gag bihbingz gvaq bonjfaenh, nyinhnaeuz Gvangjsih Gwzming Couzbei Siujcuj laebbaenz le, guh hong miz gvaq loek caeuq ceihdingz mbouj ndaej luenh gaj vunz、luenh dub vunz, de guh boux goengdaeuz siujcuj caeuq boux cujyin gwzveijvei, wnggai ngaiz rap gij cwzyin lingjdauj cujyau hwnjdaeuj.

(caengz sat)

□ Hoz Saubangj sij Cinz Siengzcouh Liuz Gingliuj Cinz Siengzgen hoiz