Seizhah aenmbwn ndatlinlin

Hwnz dinj ngoenz raez bak linx sauj

Gwnninz mbouj onj sim fanzcauq

Ninz caeux hwnq romh engq miz saenz

Mbwn ndat nengzbingh heih sanjlah

Gaejngah luenh gwn haeuxbyaek soemj

Noh ndip gaeq seng aeu aeuq naemz

Bitbingh gaeqgaemz ndi luenh gwn

Seiq haih seizseiz aeu mied raeg

Guhhong yietbaeg gaej raegrwz

Lai gwn lwghaemz caeuq lwggwz

Ndang rengz cwxcaih ndei guh saeh

Hwnz ninz mwngz gaej dan dam liengz

Funghsan baenqcienq mbouj dingh- maenh

Gwnz dungx hoemqcw saek geu man

Mbouj lau hwnj manj mbouj dwg- liengz

Ndaw rug baujciz doeng rumz ndei

Hoengheiq singjsien vunz liengzsangj

Ranzriengh seuqcingh doihduz angq

Simcingz vaiqvued engq angqyangz

Donqgwn gaxgonq swiq fwngz seuq

Ma meuz gaej luenh lumh luenh coemj

Gwn miz dinghliengh ndi gwngoemz

Sim soeng vuenyungz vunz vaiqlag

Daengngoenz ndatcik diendeih oenq

Ukgyaeuj ngoenhngwd da raiz yaengh

Hoh ndei aenndang engq youqgaenj

Ndang rengz ndang maenh mingh gyaeu nanz