Meh Lanz duenh neix cungj roxnyinh bakaek miz di in, gig nanz- youq. De bae yihyen yawj bingh, canghyw yawj le, couh hawj de liuzyih, doeklaeng youh bang de haidau. Haidau sat le, canghyw doiq vunz ndaw ranz meh Lanz naeuz, meh Lanz dwg baenz binghngaizcwng gaenq naek lo, gyaeu mbouj ndaej geijlai ngoenz lo, ceiq lai dingj ndaej ndwen ndeu. Haidaeuz, gyoengq lwg nyaenx youq ndawsim, mbouj naeuz hawj meh Lanz rox. Danhseih, yied canggyaj naeuz mbouj miz gijmaz saeh, meh Lanz yied fatngeiz, aenvih daj ndaw maekda gyoengqlwg, meh Lanz gaenq yawj ndaej ok bingh ndang swhgeij lo. Dai, de dauqfanj mbouj lau, vunz dai caeux dai geq, cungj ngaiz dai, neix cij dwg gij saeh haethaemh. Hoeng dangqnaj, meh Lanz mbouj nyienh dai, hix mbouj ndaej dai, aenvih de cuengqsim mbouj ndaej bouxsai de.

Meh Lanz caeuq bouxgvan dwg 50 bi gaxgonq youq dieg fwen ndeu roxnaj, song boux daj doiq fwen daengz daeuq fwen, daj daeuq fwen daengz bienq gvanbaz. 50 bi daeuj, song anbaz daj eu fwen daengz sij fwen, seizneix gaenq okbanj liux 9 bonj sawfwen, dangqnaj gaenq cingdoiq bonj daih 10. Youqgaenj mbouj dwg aen neix, youqgaenj dwg gvan swhgeij mbouj rox cawjgwn, mbouj rox swiq buhvaq, mbouj rox ciuqgoq ga’ndang swhgeij, de miz binghdangzniu, mbouj miz vunz ciuqgoq baenzlawz ndaej.

Bouxgvan ciuhvunz gyaez fwen, mboujdanh rox aeu Sawgun daeuj sij fwen, hix rox yungh Sawcuengh daeuj sij. Hoeng, seizndat duet buh seiznit dem daenj cix mbouj rox. Bingzciengz saeh hung saeh iq, lohloh cungj hawj de causim. Miz baez ndeu, meh Lanz miz saeh bae ranz caencik, sam ngoenz dauqma, ndaw ranz cungj luenhngaungau. Lwgdaih youq dieg- rog guh hong, bouxlan okseng seiz, meh Lanz bae daiq ndwen ndeu, ndaw ranz couh dwk dienhvah bae naeuz goenglaux binghdangzniu youh fat lo, youh haeuj yihyen liuzyih. Meh Lanz gaenjgip dauqma. Daeuj daengz yihyen, canghyw naeuz, goenglaux fat bingh, dwg aenvih de mbouj dawzseiz gwn yw. Mwngz yawj, meh Lanz liz saek ngoenz baenz ma? Meh Lanz siengj, de youq lij lix mbouj geijlai ngoenz ndawgyang, aeu son gvan rox cawj haeux、swiq buh, dawzseiz gwn yw, caj gvan gag rox ciuqgoq swhgeij le, de caiq dai bae, daengz seiz haenx, de dai goj dalaep lo.

Youq liuzyih gij ngoenz ndawde, bonjlaiz yihyen haeuxbyaek gig ndei, hoeng meh Lanz mbouj gwn, de hawj gvan soengq haeux, hawj gvan caenndang guh haeuxbyaek soengq daeuj hawj de gwn. De aeu gwn gvan cauj gij byaek、 aeuq gij danggaeq haenx, caenhguenj gvan cawj ndaej mbouj ndeigwn, meh Lanz goj aeu gvan daeuj cawj. Hoeng, gvan cawj gij haeuxbyaek saedseih nanz gwn. Meh Lanz nyaenx mbouj ndaej ciengq hot fwen ndeu daeuj:

Guh fwen baenzneix laeuz

Byaekhaeux cit lumj raemx

Aeu siengj hawj vunz haenh

Yungh saem(sim) guh hoeng ranz

Gvan de goj yungh fwen hoizdap:

Baenzgya hajcib bi

Mwngz liz gou nanzgvaq

Dingq yah song coenz ndaq

Fwen lumj raq fwn doek

Dingq ndaeij gvan baenzneix haenh, meh Lanz goj mbouj eiqseiq riu lo. De dawz hwnj gvan soengq daeuj gij haeuxbyaek haenx, gwn ndaej diemzsubsub, vanzlij nanz mbouj nanz haenhnaeuz song coenz: Ndei- gwn, ndeigwn. Gvan nyaenx roengz raemxda, yawj de gwn liux donq haeux.

Gvan moix baez soengq haeux daeuj, meh Lanz cungj nyaenx in cam de, buh swiq liux mbouj? Yw dawzseiz gwn mbouj? Goenglaux ngaekngaek gyaeuj.

Bouxgvan rox meh Lanz yungh- eiq, couh daegdaengq daenj gij buh gag swiq haenx hawj de yawj, de yawj le, aennaj hau haenx couh riu ndaej vansubsub.

Lwgluz rox le, couh naeuz, buhvaq daxboh gou daeuj swiq, haeux gou daeuj cawj. Meh Lanz dauqfanj naeuz, lij dwg hawj daxboh mwngz gag cawj haeux, gag swiq buhvaq ba. Gyoengqmwngz hwnjban nyaengq lai, caiq naeuz, goenglaux gag rox guh le, gou dai goj cuengqsim lo.

(caengz sat)