Cunghyih nyinhnaeuz, ngaeux singq caep feih van. Gwn ndip ndaej liengz lwed sanq lwed, ndaej yw fatndat bak sauj、rueg lwed、linzbing ndat daengj bingh; gwn cug ndaej ik lwed、dingz siq, lij ndaej cangq dungx、sek dungx dem. Dan yw aeu ngaeux guhcawj youq gwnz linzcangz yungh haemq lai, goengyauq gig ndei. Lumj haethaemh gwn byongh cenj raemxngaeux ndeu, ndaej yw feigezhwz ok lwed、senglwg le ok lwed、ndaeng ok lwed. Linghvaih, daem ngaeux ndip yungz nyaenj aeu raemx heuz di dangzrwi he baen geij baez gwn, ndaej yw fatndat hozhawq; raemxngaeux caeuq raemxmakleiz gak byongh cenj heuz yinz gwn, ndaej yw myaiz gwd ndat、baksauj baenzae.

Cunghyih nyinhnaeuz hohngaeux singq bingz、feih vansaep、ndaej dingz lwed sanq lwed, caemh ndaej yw ae ok lwed、rueg lwed、nyouh lwed、haex lwed、rongzva ok lwed daengj bingh. Daem hohngaeux yungz nap aeu raemx gwn, caemhcaiq ndik conghndaeng 3 daengz 4 ndik, ngoenz 2 daengz 3 baez, ndaej yw ndaeng ok lwed; aeu hohngaeux 40 gwz baek raemx gwn, ngoenz gwn 2 baez, ndaej dingz rog sieng cwk lwed; hohngaeux ndip cawz bwn swiq seuq dwk gyu iep song aen singhgiz le, mwh yungh seiz aeu hohngaeux cimq raemxgoenj le hamz ndaw bak gwn, ngoenz 2 baez, moix baez hoh ndeu, ndaej yw gipsingq conghhoz in.