Bingzseiz bohmeh aeu hawj lwgnding lai lienhndang, lai ok rog ranz bae hozdung, lai dak di ndit he, caenhliengh gaej daiq lwgnding bae giz vunz lai caeuq giz hoengheiq mbouj ndei haenx guhcaemz. Vunz ndawranz miz vunz baenz dwgliengz seiz, caenhliengh gaej bae bungq lwgnding. Dizcang cij meh gueng lwgnding, hableix gwnndoet, demgiengz lwgnding dingj bingh naengzlig.

Lwgnding gaenq baenz feiyenz seiz, aeu gyagiengz hohleix, haeujsim ndawranz hoengheiq singjsien, dohraeuj caeuq caepdoh ndawranz aeu habngamj.

Gaej hawj hoenz ien hoenz youz hoenz meiq oenq deng lwgnding, gaenx cingcawz mug ndaw conghndaeng lwgnding, gaenx fanndang bek laeng lwgnding, coi de baiz myaiz okdaeuj. Guh ndei diuzleix gwnndoet, gaenx gueng raemxraeuj hawj lwgnding, bwnq gijgwn yungzheih siuvaq hawj lwgnding.

Lwgnding baenz feiyenz aeu ciuqei canghyw daengq, ciuqseiz gwn yw dajcim duenh seizgan he. Mbangj bohmeh raen lwgnding doiq ndat le doq dingz yw, yienghneix guh yungzheih hawj bingh fukfat caemhcaiq gyanaek.