Dunghnanz Dayoz Fusuz Cunghda Yihyen Wzgoh ceiqgaenh sou yw lai boux lwgnyez aenvih dam gwn sae’gva caeuq huqgyoet yinx- hwnj baenz benjdauzdij caeuq conghhoz fatyiemz haenx, gij lwgnyez neix dingzlai dwg cungh siujhagseng.

Ciuq canghyw wzgoh Ciz Nanz gaisau, gij lwgnyez neix dingzlai raen miz fatndat、conghhoz insep, mbouj raen mug rih、ae daengj dwgliengz yienghsiengq, cazyawj conghhoz seiz raen conghhoz hoengzmaeq、cung lwed, benjdauz- dij gaenq fatyiemz lo.

Ceiqgaenh moix ngoenz duenq yawj baenz bak lai boux lwgnyez, ndawde miz sam faenh cih it dwg gij binghyiengh gwnzneix. Cujyau dwg aenvih gwn huqgyoet daiq lai yinxhwnj, mbangj nyezhung ngoenz gwn baenz seiqhaj diuz sietdiuz.

Baenz benjdauzdij fatyiemz cujyau yenzyinh dwg nengzbingh caeuq binghdoeg ganjyenj. Gij nengzbingh neix ciengz douh youq conghhoz bouxvunz caeuq ndaw congh benjdauzsen, youq cingq- ciengz cingzgvang lajde, aenvih naeng benjdauzsen caezcienz caeuq goek raemxniu mboujduenh iemqok, doengzseiz hix dawz nengzbingh baiz okdaeuj, baujciz baihndaw gengangh. Mwh aenndang naetnaiq gvaqbouh, mbangjgiz deng gij huq daiq gyoet lumj sae’gva dwk haeuj binghsiengh dung gvaq、daihliengh yinjliu gyoet swgiz le, mwh rengz dingj bingh doekdaemq seiz, benjdauzsen soengq lwed gemjnoix、gihnwngz goek raemxhanh iemqok doekdaemq、naengnoh fuengzceih naengzlig doekdaemq seiz, sigin couh ciemq haeujbae caemhcaiq daihliengh sanjmaj, couh baenz benjdauzdij fatyiemz lo.