Roegmauh dwg duz roeg iq coengmingz gyaeundei ndeu, de caepcawq bae camgya duzroeg senjgyaeu. Ndigah, gietdingh bae hag canggyaeu.

Roegciu dahcej bwnda veh ndaej ceiq gyaeu, gungjcoz daxheiz byoemmengq、 fanvunj cungj gyaeu. Roegmauh yaek bae caeuq gyoengqde hagsib.

Roegciu dahcej raen roegmauh daeuj, angq naeuz: “Roegmauh dahnuengx, mwngz dwg duz roeg gyaeundei ndeu, caiq cang di, haengjdingh gig gyaeundei.” Roegmauh dingq le angq dangqmaz.

Roegciu dahcej hainduj son roegmauh. Roegciu dahcej gangj: “Daih’it, genj nganzsaek aeu caeuq gwnz gyaeuj gwnz naj dapboiq doxhab. Daihngeih, dawz byai bit daz yinz. Daihsam, veh bwnda aeu gig saeqsim, aeu daj ndaw veh coh rog, daj laj veh coh gwnz, daj naek bienq mbaeu, menhmenh veh.”

Roegmauh rwz dingq dwk, hoeng, ndaw uk cix naemj daengz hwnj daiz doxdax swhgeij baenzlawz gyaeu.

Ciep daeuj, roegciu dahcej youq gwnz naj swhgeij guhyiengh son mbat ndeu le, dawz bit ndenq hawj roegmauh, heuh de sawq veh.

Roegmauh cuengq bit gwnz daiz bae, gangj: “Gou rox lo, gou lij aeu ganj bae caeuq roeggungjcoz daxheiz hagsib ne.” Gangj sat couh deuz lo.

Roeggungjcoz daxheiz raen roegmauh daeuj, angq naeuz: “Roegmauh lansau, bwn gyaeuj mwngz beij bwn gyaeuj gou lai, gig yungzheih guh fazhingz. Daengz seiz senjgyaeu, mwngz haengjdingh ndaej daih’it mingz.” Roegmauh dingq le engq angq lo, de naemj, swhgeij camgya doxdax ndaej daih’it mingz, geijlai sawj vunz gikdoengh ha.

Gungjcoz daxheiz hainduj son gij dinfwngz roibwn, baenzlawz roi mboeng roi sanj, baenzlawz at bingz fangienj, baenzlawz dapboiq doxhab. Roegmauh gamjdaengz daiq genjdanh, mbouj siengj dingq lo. Doeklaeng, gungjcoz daxheiz son baenzlawz guh aen fazhingz swhgeij. Roegmauh naemj, danghnaeuz youq gwnz gyaeuj swhgeij guh fazhingz, haengjdingh ndei yawj haujlai.

Gungjcoz daxheiz naeuz:“Gij buhvunj gyaeundei dwg lai cungj lai yiengh, saekgyaemqgywt gyaeundei, saekdamh hix gyaeundei……”

Doxdax senjgyaeu hainduj lo, gyoengq roeg cungj cang ndaej gyaeulili. Roegmauh youq laengdaiz naengh daengjcet, hainduj canggyaeu lo. De dawz bit youq gwnz lwgda veh bwn da, veh mbat ndeu, diuz rizsienq cocat genggyaeng. De cat le youh veh, lij dwg yienghneix. De gaij bae gaij dauq, gvaengzda cungj ndaemndatndat lo. De roi aen fazhingz gungjcoz daxheiz, roi ndaej luenhlablab, mbouj baenz saekdi yiengh. De gej sanq le caiq roi cug, gej bae cug dauq, baenzlawz hix guh mbouj ndei.

Seizgan daengz lo, de cijndei luenhlab roi coh gwnz geij mbat, cou hwnj daiz bae.

Roegmauh baez hwnj daiz, daengx ciengz cauzhuhu. Daihgya naeuz: “Dai lo, lij mbouj- caengz raen gvaq duz roeg lawz daenj nganxgingq ndaem caeuq mauh luenhlablab hwnj daiz senjgyaeu ne!”

Roegmauh saetnaj raixcaix. De caiq hix mbouj siengj camgya gijmaz senjgyaeu lo. De siengsim youh ienqhoij, swenj naeuz: “Mbouj beij……mbouj beij……mbouj beij……” Youh hemq naeuz: “Ienqhoij dai lo……ienqhoij dai lo……” (Ganh Sozvwnz/甘说文)