Miz ngoenz ndeu, lauxsae cam gyoengq doengzhag cawzle hagsib daihgya lij hag rox gijmaz. Daihgya siengj hix mbouj siengj dap naeuz：Rox vehveh、rox youzraemx、rox cawj haeux cauj byaek、rox guh hongnaz hong- reih…… Gou dingq doengzhag gangj rox guh haujlai saeh, swhgeij yiengh ndeu hix mbouj rox guh, roxnyinh gig najmong, couh siengsim lo. Lauxsae cam gou vih gijmaz siengsim, gou naeuz：“Gou mbouj rox guh gijmaz saeh, caen mbouj ndei eiqseiq.” Lauxsae dingq le riunyumj naeuz：“Mbouj youqgaenj, mwngz ma ranz yawjyawj daxmeh guh gijmaz, baenzlawz guh, mwngz hag le couh rox lo.”

Cuengqhag ma daengz ranz, daxmeh cingq yaek cauj byaek, gou cuengq ndei daehsaw, couh ndwn youq henzbien yawj. Cij raen daxmeh dawz byaek swiq seuq le, aeu cax daeuj ronq, hai feiz caj rek hoengzndat le raix youz roengz rek bae, gaendwk cuengq byaek roengz rek, yienzhaeuh yungh gucanj aeu byaek fan bae fan dauq, caj byaek yaek cug le dwk gyu roengzbae, caiq fan geij mbat, yienghneix byaek couh cauj ndei lo.

Ngoenz daihngeih, cuengqhag le, gou vaiqdi ma ranz. Aenvih gyanghaet daxmeh doiq gou gangj：“Gou mbouj youq ranz, mwngz swhgeij gag cawj byaek bw.” Gou hag daxmeh yiengh- haenx guh hwnjdaeuj：Sien swiq byaek caiq ronq byaek, diemj feiz caj rek hoengz le, dawz youz、 byaek、gyu swnh gonqlaeng cuengq roengz rek bae, gaem gucanj youq ndaw rek canj bae canj dauq. Gvaq le geij faen cung, byaek cauj ndei lo. Gou aeu dawh nip byaek daeuj cimz, Ya！Gyu dwk lai lo.

Gou baez daih’it cauj byaek yienznaeuz mbouj ndei gwn, danhseih gou hag rox cauj byaek lo, ngoenzlaeng gou aeu lailai bae guh, hawj bohmeh ndaej gwn gij byaek gou cauj feih- dauh haenx.（指导老师：覃福奇）