Gou caen najmong, doeg seiq nienzgaep lo, lienz gaiq soujgaen iq ndeu hix caengz saeg gvaq. Youq ranz, daxboh daxmeh mbouj dwg hawj gou gwn gijneix, couhdwg heuh gou gwn gijhaenx, mbouj hawj gou guh saek yiengh.

Ngoenz singhgiz roek ndeu, daxmeh cawj ndei ngaiz hawj gou, couh bae guhhong lo. Gou gwn ngaiz gvaq le, couh hwnj congz bae goemq gyaeuj ninz lo. Ninz ndiu le, fatyienh buhvaq deng hanh “cimq” dumzsubsub lo. Gou sikhaek diuq roengz congz, ra buhvaq seuq daeuj vuenh. Yawj doi buhvaq gou vuenh roengzdaeuj haenx, gou roxnyinh gij buhvaq cungj riu gou. Gou sawqmwh ndaw sim miz aen siengjfap ndeu: Gou yaek gag saeg buhvaq. Yienghneix, gou couh cuengq buhvaq roengz doengj bae, gou bae ra genj, youh bae ra banjdajsaeg, caen dwg din fwngz luenh raixcaix. Gou niuj hai suijlungzdouz, couh hag daxmeh gyaeb fandox. Gou gyaeb fandox youq naj gingq ciengq go dwk yawj bae yawj dauq. Gou cingq gag angq, raemx ndaw doengj roenx okdaeuj lo, gwnz dieg cungj dwg raemx, gou vuengmuengz bae gven suijlungzdouz, hainduj saeg buhvaq. Gou yunghrengz fou buhvaq, mbouj siujsim lwgfwngz deng fou oklwed lo, sep raixcaix. Hoeng, gou nyaenx gij in, laebdaeb saeg buh…… Daxmeh bae guhhong dauqma, yawjraen gij buhvaq gou saeg ndaej seuqset, langh ndei haenx, yaengx hwnj mehfwngz haenh gou caen ak, rox saeg buh lo.

Baez neix, gou caen naengz- ganq ha!

(指导老师:覃珍团)