Mauz Cwzdungh gangj gij vah baenzneix yiemzlig neix, biujmingz le de laemxsim ceihdingz hoenxdaeuq raixcaix. Gij vah de doiq onjdingh gwnzbiengz seizhaenx, gig youqgaenj.

Seizhaenx, Guengjsae song baij caeuq daih dingzlai ganbu vunzcungq cungj gig siengj vaiqdi ndaej hawj gwnzbiengz dauqcungz onjdingh caeuq swnghcanj cingqciengz. Hoeng, lai baez guh gvaq hong le, vanzlij miz di vunz ndeu hoenx hangz ndaej Roen Gaijfang Namzningz Si daengj gai caeuq diegyouqgaenj.

Ndaej Mauz Cwzdungh caeuq Couh Wnhlaiz cigsoh capfwngz le, daengz ndwen 8 ndawco, Namzningz gij saeh yiemzcungq doxdingj haenx cix ndaej dingzsat, dietloh Guengjsae caemh ndaej doengci dem. Gwnz- biengz Guengjsae gihbwnj ndaej onj- dingh.

Ndwen 8 ngoenz 23, Couh Wnhlaiz daengj goengdaeuz ciepraen le sojmiz gij dungzci Guengjsae youq Ging camgya banhagsib haenx, senhbu cunghyangh le《Gij Baevah Gvendaengz Laebbaenz Guengjsae Bouxcuengh Swcigih Gwzming Veijyenzvei Haenx》.

Ndwen 8 ngoenz 26, Guengjsae Bouxcuengh Swcigih Gwzming Veijyenzvei ndaej laebbaenz. Veiz Gozcingh guh cujyin, Couh Cifu、Vei Youcu、Ciuh Hungzgvangh、Ho Cwngzcungh、Anh Bingzswngh daengj 12 boux vunz guh fucujyin. Song baij cungj miz gij daibyauj doiqdaengj haenx ndaej guh veijyenz、cangzveij caeuq fucujyin.

“Vwnzgwz” ndaej song bi gij rumzrumz fwnfwn, Veiz Gozcingh cix lumj loqfangzhwnz nei. “Vwnzgwz” miz haujlai saeh de gamjdaengz geizheih, caemh goj lijgaij. Youq Baekging, miz baez ndeu, Couh Wnhlaiz iu de doxcaez naengh ci, de cix damz le di naemjfap bonj- faenh, cungjlij naeuz:“Veiz Gozcingh dungzci ha! Mwngz noix gij gingniemh sevei ho!” De dwg boux goengciengq hoenx ndaej geijcib bi ciengq haenx, dingj gvaq haujlai doxhoenx haemzhoj, hoeng “vwnzgwz” dingz doxhoenx daegbied neix, daegbied dwg haujlai ganbu laux deng loengh baenz vunzdig gaihgiz, de saedcaih naemj mbouj doeng. Mbangj hungzveibingh caeuq mbangj bouxdaeuz cujciz vunzcungq guh gvaqbouh le, de youh nanz gaem, veiznanz raixcaix.

(caengz sat)

guenj

□ Hoz Saubangj sij Cinz Siengzcouh Liuz Gingliuj Cinz Siengzgen hoiz