Sai: Danghnaeuz baenzde damz

Fungh caeuq vuengz baenz doiq

Saed yinghyungz fouzbeij

Lumj ndaundeiq gwnzmbwn

Song boux raeuz doxcaeuq

Aeu baenzciuh doengz ranz

Danghnaeuz baenzde damz

Fungh caeuq vuengz baenz doiq

Caemh dangq go faexcoengz

Mbaw loeg daengx seiqgeiq

Saed yinghyungz fouzbeij

Lumj ndaundeiq gwnzmbwn

Mbwk: Roegrumz baengh diuzmae

Cij ndaej yien hwnj mbwn

Gaem gyaeuj mae ndaw fwngz

Gou daengq mwngz gaej caeuq

Dangq gaeu unq cug rin

Gou saed sim caen ndei

Roegrumz baengh diuzmae

Cij ndaej yien hwnj mbwn

Gaej buenq saenq buenq ngeiz

Ciengzseiz ngeix ndaej hung

Gaem gyaeuj mae ndaw fwngz

Gou daengq mwngz gaej caeuq

Sai: Seizgan gaenq loq gyang

Raeuz camh damz daengz neix

Siengj doxndei baenzseiq

Muengh miz seiz caiq duenq

Biek mwngz sim mbouj sij

Dangq ciznij Niuzlangz

Seizgan gaenq loq gyang

Raeuz camh damz daengz neix

Daengq vah raeuz gaej lumz

Yaek caiq bungz baez ngeih

Siengj doxndei baenzseiq

Muengh miz seiz caiq duenq

Mbwk: Raeuz yaek siengj doxndei

Ceij bau feiz mbouj laeuh

Gou dem mwngz doxcaeuq

Caezgya youq daengz dai

Ndaej gyau baenz baengzyoux

Ngaeux gvej mbouj goenq sei

Raeuz yaek siengj doxndei

Ceij bau feiz mbouj laeuh

Rumz fwn cungj caez dingx

Haemz manh raeuz caez souh

Gou dem mwngz doxcaeuq

Caezgya youq daengz dai

Hab: Aeu fwen ma gangjgoj

Raeuz coj(cij) caez roxnaj

Doxbiek yaek baema

Caj ngoenz lawz caiq raen

Song raeuz sim doxgyaez

Baezlaeng geiq ndaw hoz

Aeu fwen ma gangjgoj

Raeuz coj caez roxnaj

Ngaeux raek sei cix lienz

Rwi ciengz yaek douh va

Doxbiek yaek baema

Caj ngoenz lawz caiq raen(sat)