(ciep geiz gonq)

Vunz dangdieg naeuz gij sing haenx dwg gij vunz youq giz dieg roen gutgoz ok saeh huxci dai bae haenx. Gangj daengz giz gutgoz neix, boux gangj maz cungj miz, gij goj de yied lwnh yied geizheih, yied gangj yied saenzgeiz, neix lainoix sawj bouxdingq sim diuq mbei dek, byoemgyaeuj daengj caez. Ndigah vunz dangdieg moix baez gvaq gizneix cungj dwg siujsim yupyup, hoeng, lij miz haujlai ci diegrog youq gizneix ok saehyak.

Ngoenzneix vunzmbanj dingqnyi sing “bunglwng bunglwng” yiengj, couh rox youh miz ci fan roengz dat bae lo, gyoengqde seiz dingz seiz swnj daeuj yawjyawj, gyoengq vunz gvaqloh haenx, hix seiz mbouj seiz dingz ci iet gyaeuj damqyawj. Aen ci fan roengz dat bae haenx, douci mbitniuj ndaej youqgaenj, hai mbouj ndaej, baengh gyoengq vunzmbanj bangfwngz, cij geuh ndaej ok fajdou. Song boux cungnienz ndaw ci baez ndonj ok ci daeuj, ndang unq ga saenz, laemx youq gwnz namh, saeknaj haumiek. Baenz moengj nanz cij hoizdauq yienzheiq, boux haici haenx naengbak saenzdedded cam lingh boux naeuz: “Lij gungh, mwngz mbouj miz saeh ba”?

“Sieng di naeng ndeu, mwngz ni?”

“Gou hix sieng di naeng ndeu, mbouj youqgaenj law.”

“Mwngz hai ci cibgeij bi, soqlaiz mbouj oksaeh gvaq, baezneix baenz- lawz……”

“Gou hix mbouj rox vih gijmaz, yaepyet couh bongh roengzbae lo, lumj naeuz miz nyup rengz ndeu rag gyaqci roengzbae nei.” Bouxhaici gangj sat doq najheu saepsat.

Vunzmbanj raen songde baenz- neix, doq humx gvaqbae, cici caca youh lwnh gij goj gvendaengz giz roen gutgoz neix, yied lwnh yied citgeiz, yied lwnh yied sawj vunz dwglau. Bouxhaici haenx dingq le byoem- gyaeuj dit, ndang hwnj manqgaeq bae.

Boux Lij gungh haenx dingq le bingzdingh dwk naeuz, raeuz bae yawjyawj najroen giz gutgoz haenx.

Songde doxrex benz daengz gwnz roen, boux Lij gungh yawj gwnz yawj laj, yawj swix ndomq gvaz, mizseiz bomq yawj, mizseiz ngengq yawj, lij aeu diuz faexdwngx ndeu daeuj dag bae dag dauq ……

Ngoenz daihngeih, bouxdaeuz dangdieg gunghlugiz ciep ndaej dienhvah, cawz deng ndaq ciengz ndeu le, youh deng bik bae cawqleix gizdieg roen gutgoz haenx.

Yienzlaiz giz roen gutgoz haenx dwg roen bwzyouzlu gaeuqgeq, giek- daej roen loemq cauhbaenz gizgoz mbiengjrog daemq mbiengjndaw sang, neix couh dwg famhgimq gij gisuz gveihfan najroen giz roen gutgoz haenx, hix couhdwg naeuz, famhgimq gij yenzlij rengz ngengcohsim, gyoeb- baenz rengz ngengcohsim iq, rengz- lizsim daih.Youq gwnz cungj roen gutgoz neix hai ci, aenci suzdu aeu beij gveihfan roen gutgoz menh haujlai, ci cij mbouj bienliz gveijdau.

Giz dieg roen gutgoz “aeu hoenz” vunz haenx, ginggvaq dangdieg gunghlugiz cawqleix le, mbouj caiq ok saehyak lo. Seizgan baez nanz, gyoengqvunz hix ciemhciemh lumz aencoh giz dieg roen gutgoz “aeu hoenz” vunz haenx lo.

Boux heuh Lij gungh haenx, yenzlaiz dwg boux gauhgiz gungh- cwngzswh ndaw Gunghlugiz ndawsi ndeu, coh de dwg Lij Cauhgez, gyoengq doengzhangz de cungj heuh de guh Lij gungh.

Gvaq song bi le, diuz goengloh ngeihgaep gvangqlangh bingzbwd ndeu daeuj dingjlawh diuzroen bwz- youzlu gaeuqgeq haenx. Daj seizhaenx hwnj, gij goj gvendaengz gizdieg roen gutgoz “aeu hoenz” vunz haenx couh deng lizsij mad bae lo.

.(caengz sat)