Ciepraen sat le, Veiz Gozcingh lienzhaemh caeuq Vei Youcu、Ciuh Hungzgvangh、Ho Cwngzcungh (55 ginh boux fuginhcangj, boux goeng- daeuz Liujcouh Lienzhab Dingjrengz Cojgingj Bangunghsiz) gij vunz camgya hai hoih haenx doxyaeng, faen Namzningz、Liujcouh、Gveilinz baenz sam aen cuj ngeixyaeng gaijgez dietloh doengci gij fueng’anq neix, caemh- caiq raiz le gij bonjgauj baugau vwndiz gvendaengz dietloh doengci haenx hawj cunghyangh. Cigdaengz 18 hauh gyanghaet 4 diemj lai cung, gyoengqde cij daj Yinzminz Daveidangz deuz bae ranzyouq.

Caenhguenj cunghyangh baecinj le baugau, hoeng ciuqyiengh mbouj ndaej gvancez roengzbae, dietloh vanzlij mbouj doeng, hoenxdaeuq yied ngoenz yied haenq, lumjbaenz gig nanz sousib.

Seizhaenx, daengx guek 29 aen swngj、swcigih caeuq cizyazsi, gaenq miz 24 aen laebbaenz le gwzveijvei. Cunghyangh saedcaih nyaenx mbouj ndaej gij yiengh Guengjsae lo, cix caenh’itbouh yungh le gij cosih yiemzlig.

Ndwen 7 ngoenz 24 daengz ngoenz 25 gyanghaet, Couh Wnhlaiz daengj goengdaeuz ciepraen le gij daibyauj song baij Guengjsae caeuq mbangj ganbu diegfueng caeuq bingdoih youh daeuj Baekging banh banhagsib haenx. Couh Wnhlaiz gig hozndat gij saehcingz yakrwix Guengjsae, de naeuz:“Guengjsae cungj hoenx ndaej mbouj baenzyiengh lo! Mbouj miz saek aen swngj lumj sou yienghneix, yaek ndaej song ndwen mbouj doengci lo. Caiq mbouj doengci lij baenz maz yiengh ha? Banringzgvaq neix couh aeu guhbaenz hezyi, itdingh aeu hawj dietloh ndaej doeng. Byawz gamj veizfanj couh yaek famhloek.” De iugouz song baij dauqbae le cungj aeu gag guh genjcaz, cingjleix vunzvaih, guh ok hengzdoengh.

Ndwen 7 ngoenz 28 gyanghaet, Mauz Cwzdungh gaenjgip ciuraen le 5 boux bouxdaeuz “baijcauhfanj” gauhag baekging, heuh gyoengqde dingzsat hoenxdaeuq, caemhcaiq yiemzlig gingjgauq gyoengqde naeuz: “Seizneix caiq fat aen bugau hawj daengx guek: danghnaeuz byawz vanzlij laebdaeb veizfanj, dub gaijfangginh、buqvaih gyaudoeng、gaj vunz cuengqfeiz nei, de couhdwg famhcoih; danghnaeuz dingznoix vunz mbouj dingq yienq, cengqdai mbouj gaij nei, de couhdwg caeggeq, couh- dwg gozminzdangj, couh yaek humx de hwnjdaeuj, danghnaeuz vanzlij cengqgengz doxdingj nei, couh yaek siumied de bae.”(caengz sat)

□ Hoz Saubangj sij Cinz Siengzcouh Liuz Gingliuj Cinz Siengzgen hoiz