“Bunglwng bunglwng……”youh miz gyaq ciiq ndeu youq giz gutgoz “aeu hoenz”vunz haenx bongh roengz reih haeuxyangz laj dat bae, yienznaeuz ci vaih lo, hoeng, vunz mbouj suenq sieng naek. Gij saeh raemhrwnh fatseng neix sawj song boux vunz cungnienz hwk dwk hoenz mbouj youq ndang.

Giz roen gutgoz “aeu hoenz” vunz neix, dwg gizdieg gutgoz roengz ndoi ndeu. Giz goz mbiengjndaw dep bya sang, mbiengjrog dep dat laeg. Dat laeg aiq miz 20 lai mij laeg, laj dat dwg gaiq reih haeuxyangz ndeu. Couh dwg giz gutgoz yawj daeuj mbouj miz maz daegbied haenx, geij bi neix daeuj seizseiz ok saehyak, ndigah vunz dangdieg heuh de guh giz roen gutgoz aeu “hoenz vunz”，de caen aeu bae haujlai diuzmingh vunz bw.

Saehyak ndawde, miz bouxsieng bouxdai bouxndanggyad, gyoengq bouxhaici mingh ndei haenx, yawj le yawj giz gutgoz neix, hix yawj mbouj ok miz maz mbouj doengz, ciuq cangzgveih bae hai ci, wnggai mbouj oksaeh ndaej ha, hoeng, gyoengq bouxhaici baenzlawz hix cungj siengj mbouj doeng. Vunz dangdieg naeuz: Giz gutgoz neix, hoenz gaeuq ciep hoenz moq, moix bi ceiq noix aeu boux hoenz moq ndeu bae.

Miz vunz lwnhnaeuz, haemh ndeu, bouxvunz mbanj gyawj ndeu daj reih haeuxyangz laj dat byaij gvaq, sawqmwh dingqnyi sing cauzhuhu, lumj dwg gangjgoj youh lumj dwg doxceng, ngeng rwz baez dingq, youh dingq mbouj ok dwg gangj maz vah, boux haenx yawjyawj seiqhenz, dan miz sing gangj mbouj raen vunz, de hwk dwk gyaeuj cumh ndang saenz, daengx ndang caepcatcat, de cacoemj soemxsax buet ma ranz. Mbouj geij nanz de baenz ciengz bingh naek ndeu, mbouj geij nanz couh dai bae lo. Vunzmbanj naeuz de deng hwk mwhhaenx, hoenz gaenq ngaiz giz roen gutgoz aeu bae, yawz ndoj ndaej gvaq ciengz nanh neix?

Lij miz vunz lwnhnaeuz, ngoenz ndeu banringz, boux coz ndeu hai mohdozceh gvaq giz roen gutgoz neix, mumjmumj gyumqgyumq dingq- nyi singgyangz daj laj dat cienz daeuj, de laihnaeuz miz vunz doek dat, dingz ci roengzdaeuj yawj, baez dingz ci, singgyangz mbouj miz lo, hix mbouj raen miz riz fan ci, de geizheih dwk yiengq laj dat hemq“miz vunz lwi?”Hemq geij sing cungj mbouj miz vunz han, de hwnj ci ngamq hai bae song mij gyae, singgyangz youh cienz daeuj lo, de baez dingz ci, singgyangz youh dingz lo, de youh yiengq laj dat hemq geij coenz“miz vunz lwi?” Hoeng, ciuqyiengh mbouj miz vunz dap vah, seizhaenx de hoenz mbin nyouh yaet dangzvaq, doq simvueng dwk hai ci bongh baenaj.

Mwhgonq laj dat miz aen miuh ndeu, vunz dangdieg haengj youq gizde gingq baed dojdeih. Geij bi gonq cwngfuj gaihcanj baetcawz maezsaenq hozdung cek miuh bae. Gyoengq vunz dangdieg naeuz couh dwg aen miuh deng cek bae, mauhfamh le duzbaed dojdeih, ndigah duzbaed dojdeih youq giz roen gutgoz neix sou aeu hoenz vunz bae dangguh fad vunz gwnz- biengz, ndigah gizhaenx geij bi daeuj laebdaeb ok saeh gyaudoeng.

Vunz dangdieg naeuz gij sing haenx dwg gij vunz youq giz dieg roen gutgoz ok saeh gyaudoeng dai bae haenx. Gangj daengz giz gutgoz neix, boux gangj maz cungj miz, gij goj de yied lwnh yied geizheih, yied gangj yied saenzgeiz, neix lainoix sawj bouxdingq sim diuq mbei dek, byoemgyaeuj daengj caez. Ndigah vunz dangdieg moix baez gvaq gizneix cungj dwg siujsim yupyup, hoeng, lij miz haujlai ci diegrog youq gizneix ok saehyak.(caengz sat)