Gou daj iq couh gig gyaez duzmeuz, dingjlingz miz ngoenz ndeu, gou youq gwnz loh gip ndaej duz meuz ndeu dauqma. Duzmeuz daengxndang bwn hau, cik ganaj de deng sieng lo, gig hojlienz, gou yaek ndeindei bang de yw sieng.

Duzmeuz haidaeuz cungj mbouj haengj gwn doxgaiq, itcig meumeu heuh mbouj dingz. Dwg ga de in lai ba, gou couh umj de bae hawj canghyw ndaw mbanj yw. Ga sieng bau ndei le, gou caiq dawz di cuk daeuj hawj de gwn, baezneix, de diemzsisi gwn lo. Duzmeuz song ceh da ndongqliklik cimyawj gou, lumjbaenz doiq gou gangj:“Mwngz caen ndei! Docih mwngz!” Gou ciengzseiz bang duzmeuz dajcaemx, seiz ndaejhoengq gou couh daiq de bae youzbyaij. Ciemhciemh dwk, gou caeuq duzmeuz baenz baengzyoux ndei lo. Duzmeuz yied maj yied dwggyaez lo.

Miz baez ndeu, gou lumj bingzseiz ityiengh daiq duzmeuz bae rog youzbyaij. Gou cingq angqvauvau dwk byaij bae naj, sawqmwh, baez mbouj siujsim, din dik deng ndaek rin deng sieng lo, lwed baenz ndik baenz ndik ndik roengz lajnamh, gou in ndaej hemqyoyo. Duzmeuz raen gou yienghneix, couh vax di nywj daeuj hawj gou oep sieng, yienzhaeuh buet deuz lo. Geizgvaiq, gij sieng mbouj caiq ok lwed lo, daxmeh hix daeuj lo. Yenzlaiz dwg duzmeuz bang gou bauqsaenq, gou laihnaeuz de mbouj leixlangh gou ne! Daxmeh naeuz: “Go’nywj neix heuh guh rumhaeu, ndaej dingz lwed.” Yo, duzmeuz caen coengmingz ha!

Neix couhdwg aengoj gou caeuq duzmeuz, mwngz yawj duzmeuz geijlai dwggyaez ha!

( 指导老师:陈彩仙)