Daxau gou dwg boux siujyoz lauxsae, de samcib lai bi, mbouj sang mbouj daemq, daiq fouq nganxgingq ndeu, yienghceij gig swnhsienh. De gig gyaez yawjsaw, moix baez raen bonjsaw habhoz, couh itdingh aeu cawx, baez cawx ma le, aeu saw yawj sat cij cuengq roengz, caen dwg boux sawmaez dahraix.

Geiq ndaej miz baez ndeu, gou bae ranz daxau guhcaemz, mehsimj couh heuh daxau bae cawx byaek. Daxau gig vaiq dapwngq lo. hoeng mehsimj mbouj cuengqsim, heuh gou itheij bae, cujyau dwg bae gamduk daxau. Mwh dou gwih ci daengz bakdou Sinhvaz Suhden, daxau roengz ci doiq gou naeuz:“Gou haeujbae yawjyawj miz mbouj miz saw moq, mwngz youq gizneix caj gou yaep he.” Gou gangj:“Mehsimj mbouj hawj haeujbae bw.” De gangj:“Lanmbauq, gou couh bae yaep he, mwngz mbouj gangj, byawz hix mbouj rox.” Gou caengz dapwngq, daxau couh haeujbae lo, gou cijndei youq rog bakdou caj de. Daih’iek gvaq le buenq diemj cung, lij mbouj raen daxau okdaeuj. Gou simgip lo, danghnaeuz caiq mbouj okdaeuj, mbwn couh laep lo. Gou nyaenx mbouj ndaej buet haeuj ndaw suhden bae yawj, cij raen daxau maeuq youq henz gyaqsaw, song fwngz bungj bonj saw he, yawj ndaej haeujmaez sisi. Gou vaiq byaij gvaqbae, sing hung dwk doiq daxau naeuz: “Daxau, vaiq bae cawx byaek ba, mboujne byaek vunz cungj gai liux lo.” Dingq gou yienghneix gangj, daxau cij singj gvaqdaeuj, rag dawz fwngz gou buet okdaeuj, gipgip muengzmuengz bae cawx byaek.

Daxau gou couhdwg yienghneix gyaez yawjsaw, caencingq dwg boux saemaez ndeu.

（指导老师：陆雪燕）