Seizneix gou doeg sam nienz- gaep lo, youq ndaw hagdangz gou hag ndaej haujlai cihsiz Sawcuengh. Gangj daengz Sawcuengh, gou lij aeu docih daxbuz gou ne, dwg singfwen Vahcuengh ndei dingq daxbuz yinx gou haeujmaez, hawj gou gyaez hwnj Sawcuengh.

Geiq ndaej miz ngoenz ndeu haetromh, raq sing ndeu cauz singj gou lo, gou nunu da hwnqcongz le, riengz gij sing byaij bae, byaij daengz bakcauq, raen daxbuz cingq ciengq gijmaz go. Gou geizheih dwk cam daxbuz:“Daxbuz ha, mwngz ciengq gijmaz go ha? Ndei dingq bw.” Daxbuz riunyumnyum naeuz:“Lan ya lan, duzroeg gwnz faex hemqcaca, gou ya gou, dawz fwen daeuj ciengq ya dawz fwen ciengq.” Baezneix gou dingq ndaej rox lo, dwg fwenh Vahcuengh. Daxbuz lumj fwt siengj hwnj gijmaz nei, ngeux gyaeuj gvaqdaeuj, naeuz:“Lan ya, ndaw hagdangz mwngz mbouj dwg son Sawcuengh ha? Baezlaeng mwngz hag de, hag ndaej ndei le, ndaej bang gou dawz fwen geiq roengzdaeuj lo, yienghneix ha, couh miz engq lai vunz rox eufwen lo.” Gou baez dingq, roxnyinh daxbuz gangj gij vah gig miz dauhleix.

Doeklaeng, gou bae hagdangz couh nyinhcaen hag Sawcuengh, doeg Sawcuengh, lauxsae hwnjdangz seiz, gou couh nyinhcaen dingq, baez bungz daengz miz maz mbouj rox couh cam doengzhag, cam lauxsae.

Sam bi gvaqbae lo, gou hag ndaej le haujlai cihsiz Sawcuengh, seizneix gou ndaej bang daxbuz geiq fwen lo.

gou bang daxbuz aeu fwen baen baenz cek geiq roengzdaeuj, ndaej- hoengq seiz, daxbuz couh caeuq buzlaux, goenglaux ranznden comz youq itheij eufwen, dou bang lwgnyez neix couh itmienh yawj cekfwen itmienh gaen daxbuz eu, coenzcoenz fwen eu ok bak, singsing fwen geiq haeuj sim, bouxlaux rox eu, dou lwgnyez hix rox eu, sing fwen goksasa. Caen dwg:

Bouxcuengh Bouxcuengh gangj Vahcuengh

Sawcuengh Sawcuengh yungh- cawq lai

Daxbuz eufwen gou daeuj geiq

Daengxheij eufwen goksasa

（指导老师：韦丽平）