Veiz Gozcingh daengz Baekging ngoenz daihsam, 6 nyied 1 hauh, dietloh dajyinh aenvih hoenxdaeuq, youq Liujcouh Hojcehcan deng gaetduenh.

Liujcouh Hojcehcan dwg aen suhniuj Baekging doeng coh Yeznanz、Daihsaenamz doeng coh Can’gyangh haijyinh ndeu. Baezneix deng gaet- duenh, gij doxgaiq bing’aeu bang Yez dingj Meij haenx cix mbouj ndaej yinh bae Yeznanz lo, Daihsaenamz caeuq Guengjsae doxgaiq cingouj cuzgouj caemh deng yingjyangj. Gijneix dwg gij vwndiz youqgaenj raixcaix.

Cunghyangh youq ndwen 6 ngoenz 3 hauh fat aen 《Haj Diemj Cijsi Gvendaengz Vwndiz Liujcouh Haenx》hawj Gvangjsih Gwzming Couzbei Siujcuj、Gvangjsih Ginhgih、Liujcouh Dietloh Ginhgvanjvei le, youh youq ndwen 6 ngoenz 13 fat gij dienhbauq daeggaenj okdaeuj, iugouz gij cujciz vunzcungq dietloh song baij sikhaek dingzsat hoenxdaeuq, gij vunz danvih wnq sikhaek daj gak aen danvih dietloh doiq okdaeuj, caen- hvaiq dauqfuk gyaudoeng dajyinh, gyau gij doxgaiq bang Yez dingj Meij haenx caeuq gij doxgaiq cungqbauq gaijfangginh okdaeuj caez bae.

Cunghyangh song baez cijsi, youh bae guh hong Gvangjsih Gwzming Couzbei Siujcuj、Gvangjsih Ginhgih, cungj sou mbouj ndaej yauqgoj.

Veiz Gozcingh、Vei Youcu、Ciuh Hungzgvangh sam boux goengdaeuz youq Baekging neix ciuq gij vah Couh Wnhlaiz dangqnaj lwnh hawj gyoengqde haenx, daj ndwen 6 ngoenz 13 hwnj, youq cunghyangh cigsoh dazyinx lajde, daj hong dietloh Guengjsae ndawde cou 60 lai boux ganbu dingjrengz “cojgingj” haenx okdaeuj bae Baekging banh banhag- sib, gaijgez bingdoih bonjfaenh swhsiengj doengjit caeuq dietloh doengci gij vwndiz neix.

Ndwen 6 ngoenz 17 banhaemh, Couh Wnhlaiz daengj goengdaeuz youq Yinzminz Daveidangz aen ding baihdoeng haenx ciepraen le sojmiz gij ganbu banhagsib. Cungjlij sim’in naeuz:“17 ngoenz mbouj ndaej doeng- ci lo, gaijfang gvaqdaeuj coengzlaiz mbouj bungq deng dingz saeh neix.” De lij naeuz:“Danghnaeuz sam ngoenz gaijgez mbouj ndaej doengci vwndiz, yaek caenh’itbouh naemj banhfap, cunghyangh mbouj ndaej mbouj laemxsim lo, mbouj ndaej caiq ngaiznyed lo.”(caengz sat)

□ Hoz Saubangj sij Cinz Siengzcouh Liuz Gingliuj Cinz Siengzgen hoiz