Sai: Lauxsaed doiq mwngz naeuz

Boux vunz gou cingqbanj(cingqging)

Raen mwngz caemh dikdangq (habsik)

Cij daihdamj bae gouz

Mbouj dwg naeuz gangjgyaj

Cij baenaj daeuj gouz

Lauxsaed doiq mwngz naeuz

Boux vunz gou cingqbanj

Daihhaij raemx haemq bingz

Dingh doh ruz daengz hamq

Raen mwngz caemh dikdangq

Cij daihdamj bae gouz

Mbwk: Dingqnyi go neix gangj

Gou caengz ngvanh ndaej doeng

Couh lumj vunz byaij roen

Lau saek ngoenz yamq loek

Lumj dafangz diemj daeng

Dangq aen gvaengz fouz hamq

Dingqnyi go neix gangj

Gou caengz ngvanh ndaej doeng

Caemh dangq vunz benz faex

Ndei hwnj mbouj ndei roengz

Couh lumj vunz byaij roen

Lau saek ngoenz yamq loek

Sai: Cingqsoq dwg vunzbaz

Yaek miz maz haeujheiq

Cijaeu raeuz hab’eiq

Mwngz gaej ngeix baenzlai

Gou gangj vah ndawsim

Cij cingj mwngz daeuj ra

Cingqsoq dwg vunzbaz

Yaek miz maz haeujheiq

Raeuz gvanbaz baenzseiq

Itdingh ngeix ndaej ndei

Cijaeu raeuz hab’eiq

Mwngz gaej ngeix baenzlai

Mbwk:Siengj yenhyangh baenz doiq

Ngoenz guhdoih angqyangz

Lau lumj boux Couh Langz

Vut dah Vangz Siujcej

Mbouj dwg gangj saek di

Bi seiqgeiq angqhoih

Siengj yenhyangh baenz doiq

Ngoenz guhdoih angqyangz

Guh gvanbaz baenzseiq

Caezgya cungj sim’angq

Lau lumj boux Couh Langz

Vut dah Vangz Siujcej

(caengz sat)