Laeng ranz miz gaiq reih fwz ndeu, gaiq reih fwz neix iqetet, daihgaiq miz geij leiz reih yiengh- haenx gvangq. Gaiq reih neix yienznaeuz iqetet, hoengq, doiq gyoengqvunz youq gwnzgai daeuj gangj, conq namh bengz baenz conq gim ha.Gaiq reih neix youq ndaw lwgda mehya gou, caen dwg gaiq reih dijbauj baenz gim ndeu. Mehyah gou raen gaiq reih neix vut fwz, gig gyoh, seiz mbouj seiz doiq naj gou gangj, yaek ra aen seizhoengq ndeu, dawz gaiq reih neix haifat daeuj.

Gou rox mehyah siengj yiengh- neix guh, mbouj naihfanz dwk naeuz de:“Mwngz gaej simdamq lai lo. Hong ndaw danhvei cungj guh mbouj daeuj, gizlawz miz seizgan bae hai fwz ne? Caiq gangj, couhcinj hai di fwz neix okdaeuj lo, mwngz youh naengz ndaem ndaej gijmaz doxgaiq daeuj ne.”

Mehyah dingq gou baezneix gangj le, riuhehe naeuz:“Doxgaiq gag miz gag yunghcawq, lumj gaiq reih neix, yienznaeuz iqetet, hoeng, hix miz de yunghcawq bw! Gou siengj coih de ndei daeuj, dawz de daeuj ndaem byaek, danghnaeuz ndaem ndaej ndei, goulau gaeuq ranz raeuz gwn byaek baenz hopbi, cungj mbouj yungh bae laj bouqdanq cawx byaek lo.”

Gou han mehyah naeuz:“Mwngz caen saehcingz lai lo, gou cix mbouj miz seizgan caeuq mwngz bae guh cungj hong neix ne.” Mehyah youh naeuz:“Mwngz lij geiq ndaej vahsug gangj lwi, vahsug gangj: Ndaw daeh miz ngaenz, mbouj beij ndaem reih miz byaek. Vut reih fwz mbouj ndaem, nyienh bae gwnz haw cawx byaek, caen lumj vahsug gangj baenzhaenx ityiengh. Couhcinj ndaw daeh mwngz miz ngaenz, danghnaeuz mizseiz gaenj yungh byaek, youh mbouj miz seizgan bae cawx, daengz seizhaenx, mwngz couh rox gag ndaem baenz byaek dwg geijlai dijbauj bw!”

Caen simfug gyoengq mehmbwk baenzneix ngeix ndaej daengzgok lo. Gou gangj mbouj gvaq mehyah, fouznaih cijndaej youzcaih de baij- bouh lo.

Yienghneix, youq ngoenz singhgiz ndeu, haetromh, mehyah caeuxcaeux couh hwnqcongz lo. Gou lij siengj laih mbonq ninz yaep ndeu, mehyah cix mbouj hawj, itdingh nyaux gou hwnqcongz. Caj gou hwnqcongz le, guh baenz mbat swiq cat ndei le, mehyah naeuz:“Vaiq gwn caeuzhaet ba! Gwn rim le, ndei caeuq gou itheij bae hai gaiq reihfwz laeng ranz raeuz!”

Caen mbouj miz banhfap doiduet lo. Gou cijndaej riengz mehyah coh gaiqreih laeng ranz byaij bae. Dou song boux vunz, boux ndeu gaemdawz liemz, boux ndeu gaemdawz gvak, caez daeuj daengz gaiq reih laeng ranz haenx. Dou sien dawz reih fwz vuet seuq, caiq dawz vuet ndaej gij rum gij nyangj haenx dong baenz dong, liux le, yungh feiz coemh dong rumnyangj, rumnyangj coemh liux lo, couh gvak reih, gvak mbouj geij nanz, gaiq reih iqetet neix couh gvaek ndei lo. Ciep dwk, dou youh dawz gij reih gvak ndei haenx, caiq yungh faggvak dueb namhgik soiq bae, guh baenz fog. Guh fog baenz le, youq gwnz fog rwed di raemx le, caiq yiengq gwnz fog vanq cehbyaek, yienghneix byaek couh suenq ndaem baenz lo.

Gvaq geij ngoenz le, bae ndaw reih baez yawj, cehbyaek gaenq did ngaz lo, dinbyaek maj ndaej oiq- cupcup, heusausau, nyex vunz gyaez dangqmaz. Dou song boux lumj ganq lwgnding nei, yunghsim ganq dinbyaek, ngoenznaengz roengzban ma ranz, cungj yaek bae ndaw reih yawj dinbyaek baez ndeu. Dou mbouj- danh bae yawjyawj, lij ngoenz ndeu song ngoenz couh hawj dinbyaek rwed baez raemx ndeu, caj dinbyaek loq maj hung le, youh ra bwnh roxnaeuz dawz nyouh bae dwk. Cib lai ngoenz gvaq bae le, dou ndaem gij byaek haenx, maj hung lo, ndaej mbaet ma gwn lo.

Dingjlingz, ndaw geij ngoenz haenx, miz baengzyoux daeuj ranz gwn laeuj. Gwn daengz banhaemh cib diemj lai cung, byaekheu gwnz daiz cungj gwn liux lo. Gou raen mboujmiz byaekheu, couh heuh mehyah bae ndaw reih laeng ranz mbaet di byaek ma. Mehyah riu naeuz:“Seizneix mwngz rox luba, ndaem byaek gaxgonq gou baenzlawz doiq mwngz gangj lij geiq ndaej lwi?”

Gou naeuz: “Geiq ndaej vahsug gangj: Ndaw daeh miz ngaenz, mbouj beij ndaw suen miz byaek.”

Mehyah dingq le, riuhoho hwnj- daeuj, okbae ndaw reih mbaet byaek lo.