Cuk maknengznuengx: Aeu maknengznuengx 30 gwz (ndip 60 gwz), 60 gwz haeuxcid, di dangznae ndeu. Swiq maknengznuengx seuq caeuq haeuxcid caez cawj cuk cug le dwk dangznae couh baenz gwn. Cuk maknengznuengx ndaej nyinh bouj daep yaem、ciengx lwed raeh da, hab boux daep mak sied haw yinxhwnj baenz gyaeuj ngunh da raiz、boux ninz mbouj ndaek fangzhwnz loq lai、boux rwz maenj hwet naet、byoemgyaeuj hau caeux gwn.

Cuk gaeujgij: Aeu 30 gwz ceh gaeujgij, 60 gwz haeuxnaz, sien cawj haeuxnaz buenq cug, caiq dwk ceh gaeujgij roengz itheij cawj cug couh baenz gwn. Cungj cuk neix daegbied hab boux ciengzseiz gyaeuj ngunh da saep、rwz maenj laeuh cing、hwet in naet gwn. Boux baenz ganhyenz gwn cuk gaeujgij, ndaej baujhoh aen’daep, coi sibauh aen’daep caiq seng.

Cuk vamoiz: Aeu 5 gwz vamoiz hau, 80 gwz haeuxsuen. Sien cawj haeuxsuen baenz cuk, caiq dwk vamoiz hau roengz cawj goenj 2 daengz 3 faen cung, moix donq gwn vanj ndeu, laebdaeb gwn 3 daengz 5 ngoenz. Vamoiz singq bingz, ndaej so daep leix heiq, hawj vunz lai gwn ndaej doxgaiq. Boux gwn doxgaiq mbouj ndaej gwn cungj cuk neix yaugoj gig ndei, gwn le ndang cangq miz rengz.