Doenghbaez, laj din goengq bya ndeu miz aen mbanj iq ndeu, vunzmbanj cungj gig hoj, mbouj miz ngaenz cawx vaiz ma dajcae.

Ndaw mbanj miz song cejnuengx, gaenxhong youh sienhsoh.

Ngoenz ndeu, song cejnuengx youq dinbya gvak reih, gvak deng ngauq namh geng ndeu, ngauq namh gag dek okdaeuj, ndaw miz aen lahbah ngaenz iq ndeu. Cejnuengx yaek gaemdawz aen lahbah ngaenz,sawqmwh, miz goengsien ndeu daeuj gangj: “Gwnz bya miz aen gamjsien ndeu, ndaw miz bak duz vaizgim, daengz hwnz, ndaw bya yiengj bak- gamj couh rongh, dawz aen lahbah neix baek haeujbae, caiq nam sam baez ‘byavaiz byavaiz yiengjsasa, lahbah hai gamj bakajaj’, bakgamj couh bienq hung. Haeuj gamj bae umj ndaej duz vaizgim ndeu okdaeuj, boq aen lahbah neix yiengj, vaizgim couh bienq lix, yienghneix ciuhvunz gwndaenj couh mbouj you lo. Hoeng, gaeq haen gamj couh haep, vunz gven ndaw gamj haengjdingh dai.” Gangj sat, goengsien couh mbouj raen lo.

Song cejnuengx ma ranz dox- yaeng, raeuz aeu hawj vaizgim cienzbouh bienq lix bae, faen hawj daihgya, hawj daihgya cungj miz vaiz gengnaz. Yienghneix, couh lwnh vunzmbanj, daengq daihgya gyang- hwnz hwnj bya bae yien vaiz.

Gyanghwnz laepngaungau, cej- nuengx hwnj bya. Byonghhwnz gvaq, sawqmwh ndaw bya yiengjsasa, bangxbya miz sienq rongh ingj okdaeuj. Song cejnuengx gaenjgip buet gvaqbae.

Aen bakgamj haenx cij lumj lwgfwngz iq, yawj coh ndaw gamj, cij raen ndaw miz aen daizgim ndeu, gwnz daiz baij rim vaizgim iq lumj aenmba. Dahnuengx muengz dawz lahbah ngaenz cap haeuj bakgamj bae, dahcej nam:“Byavaiz byavaiz yiengjsasa, lahbah hai gamj bakajaj.” Nam le sam baez, bakgamj menhmenh bienq hung lo. Cejnuengx buet haeuj ndaw gamj bae.

Dahcej baez haeujbae couh boq lahbah, lahbah baez yiengj, vaiz gim couh sikhaek bienq lix diuq roengz daiz, bienq hung, cung ok gamj. daengz duzvaiz ceiq doeklaeng ngamq ndonj ndaej gyaeuj okbae, gaeq haen lo, bakgamj menhmenh bienq iq, gab deng dungx vaiz, vaiz ok mbouj bae lo. Seizneix, song cejnuengx vueng lo, doengzcaez roengzrengz gingx caek- haex duzvaiz, hoeng, gingx mbouj doengh.

Caiq gangj gyoengq vunzmbanj dingqnyi lahbah yiengj, couh buet hwnj bya, raen baenz lai vaiz daengx bya buet, couh boux duz boux duz yien vaiz. Daihgya cingq siengj docih song cejnuengx, hoeng, baenzlawz hix ra mbouj raen songde. Seizneix raen duzvaiz deng gab, daihgya couh gvaqbae haenqrengz beng gaeu rag din, hoeng, cungj rag mbouj ndaej okdaeuj, doeklaeng, hawj duzvaiz raek aen geuzndaeng, gwnz geuz cug cag raezramram, caiq caez haenqrengz baez rag, vaiz in le, din baez cak couh bongh okdaeuj lo. Bakgamj sikhaek haep ndaet lo. Aen lahbah ngaenz baek gwnz bakgamj haenx baenqlulu doek roengz namh, sikhaek bienq baenz go miuz iqet ndeu, maj rag dangh gaeu, laebdaeb hai haujlai va iq lumj lahbah nei.

Song cejnuengx deng gven youq ndaw gamj caiq hix mbouj ndaej okdaeuj lo. Vunzmbanj vih geiqniemh songde, dawz go neix heuhguh valwgbaenq、valahbah、vayienvaiz.

(Ganh Sozvwnz/甘说文biensij)