Youq ndaw saedceij seiz- iq, miz haujlai saeh mizyinx, ndawde miz gienh saeh ndeu hawj gou ceiq nanzlumz.

Geiq ndaej gou haj bi seiz, miz baez ndeu, gou dingqnyi daxboh doiq dahcej naeuz: “Bouxlawz ndawdungx miz raemxmaeg lai, bouxde couh miz cihsiz lai.”

Ngoenz ndeu, caj daxboh mbouj youq ranz, gou couh caegcaeg buet daengz ranzsaw daxboh, gaem hwnj bingz raemxmaeg, niuj hai fabingz baez nyouq, raemxmaeg caen haeu ha, aeu linx baez riz, saep raixcaix, baenzlawz ndoet ndaej ha? Gou baez siengj, miz banhfap lo, gou couh gya di dangz haeujbae, vihliux baenz bouxvunz miz cihsiz, ngiengx gyaeuj dawz bingz raemxmaeg ndoet roengz dungx bae, gou angq dwk naeuz:“Gou baenz bouxvunz miz cihsiz lo.”

Sing hemq yinx daeuj daxmeh, de doeksaet dwk cam gou:“Gwnz bak mwngz dwg gijmaz?” Gou angq dwk lwnh daxmeh:“Dwg raemxmaeg ha.” “Vihmaz ndoet raemxmaeg?” Daxmeh cam, gou dawz saeh- cingz ginggvaq lwnh daxmeh, daxmeh riu daej mbouj baenz, riu naeuz:“Lwg huk ha, raemx- maeg baenzlawz gwn ndaej ne? Daxboh gangj ndawdungx raemxmaeg lai dwg gangj miz cihsiz, mwngz roengzrengz hagsib le, ndawdungx raemx- maeg couh lai lo.” Gou dingq le mbouj eiqseiq dwk riu lo.

Sou yawj, gij saeh fatseng youq seiziq geijlai mizyinx ha!

（指导老师：郑振常）