Daxgoeng gou gaenq roekcib lai bi lo, gwnz gyaeuj byoem cungj hau lo, fajnaj nyaeuqnyatnyat.

Daxgoeng gou gig gvansim gou. Geiq ndaej miz ngoenz ndeu lajbyonghngoenz, gou sawqmwh baenzbingh, youh gyaeujin youh ae mbouj dingz, caemhcaiq rueg dem.

Cingq youq seizhaenx, daxgoeng gou daj ndaw reih gip mbawsangh ma daengz ranz lo. De raen gou baenz bingh, goq mbouj ndaej swhgeij dungx iek caeuq naetnaiq, sikhaek aemq gou bae veiswnghsiz yawj bingh. Byaij daengz buenq loh, daxgoeng gou gaenq naiq ndaej hanh lae hanh roenx, gou heuh de dingz roengzdaeuj yietnaiq yaep ndeu, hoeng de naeuz gij bingh gou nguh mbouj ndaej, aeu ganjvaiq bae hawj canghyw yawj. Ganj daengz veiswnghsiz seiz, gij buh daxgoeng gaenq deng hanh cimq dumz lo. Canghyw hawj gou yawj bingh hai yw le, daxgoeng aeu raemx daeuj hawj gou gwn yw. Gvaq yaep ndeu, gou roxnyinh ndei haujlai lo, daxgoeng youh bae cawx gij doxgaiq gou gyaez gwn haenx hawj gou gwn……Yawjraen gou dauq cingsaenz le, daxgoeng naj riu lo.

Daxgoeng gou yienghneix gvansim gou, gou itdingh aeu ndeindei hauqswnh de.

（指导老师：覃寒春）