Daxmeh gou bi neix ndaej 37 bi lo, de maj ndaej mbouj sang mbouj daemq, byoem raezrang ndaemndongq, naeng- bak mbangmbi’mbi, bakraeh raixcaix. Hoeng, gou gig gyaez daxmeh, aenvih de gig gaenx guhhong.

Ngoenz ndeu banngaiz, daxmeh cien duzbya, daxboh fwngz gaem bonj saw ndeu, ndwn youq henz itmienh yawj saw, itmienh guh bangfwngz daxmeh. Daxmeh cien dwk cien dwk, doiq daxboh naeuz: “Aeu ciengqyouz daeuj hawj gou.” Daxboh cij goq yawj saw, mbouj dingqnyi daxmeh gangj vah. Daxmeh youh naeuz mbat ndeu, daxboh dingq mbouj cingcuj, couh cam: “Gijmaz? Mwngz gangj gijmaz ne?” Baez neix, daxmeh hozndat lo, sing hung hwnjdaeuj:“Gou gangj geijlai baez lo, mwngz baenzlawz lij cam?” Daxboh sing’unq naeuz: “Gou mbouj dwg dingq mbouj cingcuj ma?” Daxmeh laebdaeb raemh naeuz:“Byawz heuh mwngz yawj saw lo, gou mbouj dwg heuh mwngz aeu ciengqyouz daeuj ha?” Daxboh naeuz:“Mwngz noix gangj song coenz ba. Gou sikhaek aeu ciengqyouz daeuj hawj mwngz, mwngz couh gaej raemh lo?” Seizneix, ndaw rek hwnj hoenz lo, raq heiq remj ndeu sanq okdaeuj lo. Daxmeh hat naeuz: “Mwngz yawjyawj, duzbya cien remj lo, cuet lo, cuet lo, mbat neix mbouj ndei gwn lo.” Daxboh sing daemq naeuz: “Byawz heuh mwngz cien bya remj bae?” Byawz rox, coenz vah neix nyex daxmeh engq raemh lo:“Cungj gvaiq mwngz, danghnaeuz mwngz mbouj yawj saw, miz sim bang gou, duzbya baenzlawz ndaej cien remj ne? Mwngz gangj, mwngz boux bangfwngz dwg baenzlawz dang? Duz bya neix baenzlawz gwn! Mwngz gag gwn lo?”

Daxmeh gou couhdwg yienghneix, gou caen maq- muengh de gaij gij bakraeh de bae, gaej raemhraex baenz lai.

（指导老师：覃珍团）