□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Gvangjsih gwzmingz veijyenzvei couzbei siujcuj laebbaenz codaeuz geij ndwen, caenhguenj miz mbangj singz caeuq mbangj yienh gij saehnaeuh haenx fanfanfoekfoek, hoeng daj cingjdaej daeuj gangj, daihlienzhab dingz heiqfaenh neix ngoenz naemq gvaq ngoenz. Daengz bi 1968 ndwen 4, Gvangjsih 8 aen digih、4 aen si、82 aen yienh, miz 7 aen digih、2 aen si、75 aen yienh laebbaenz le gwzming veijyenzvei. Gij cangj gvangq cujyau Namzningz Si haenx dingzlai cungj ndaej daihlienzhab gvaq.

Swcigih gwzmingz veijyenzvei couzbei siujcuj ciuq gij cingsaenz cunghyangh, caeuq gij cujciz vunz- cungq song baij doxyaeng, caemhcaiq cinghgiuz ndaej gij yigen Gvangjcouh Ginhgih le, youq bi 1968 ndwen 4 ngoenz 26 cingqsik baugau hawj cunghyangh, daezok gij genyi laeb- baenz Swcigih Gwzming Veijyenzvei neix.

Hoeng, gij hingzsi doxdaeuq haenq gvaq vunz naemj.

Linz Byauh、Gyangh Cingh gij vunz neix yukyon le, gij guengzciuz vuzcwngfujcujyi bonjlaiz gaenq ndaej caemdingh duenh haenx youh youq Gvangjsih fanfoek hwnjdaeuj dem, gij geizbaij song baij gaenq yo hwnj- daeuj haenx youh dauqcungz baek okdaeuj dem, gij byauhyij、daswbau baijsingq haenx sawqmwh demlai, hoenxdaeuq caenh’itbouh bienq haenq dem.

Daj bi 1968 ndwen 5 hainduj, song baij daih gveihmoz bae ciengj cungq, baij ndeu bae ciengj gij cungqbauq cangcungqbauq Gvangjsih Ginhgih, baij ndeu bae ciengj gij doxgaiq cungqbauq bang Yez dingj Meij haenx, lij haenq baenz cungdingj bingdoih、caeghoenx cibing、ciengj diemqbouq guekgya, sieng gaj gij haksonyinx gaijfangginh caeuq ganbu vunzcungq daengj saehrwix saehyak. Gij hezyi daihlienzhab song baij youq Baekging ciem haenx deng sik soiq, hong bwhguh siujcuj engqgya hoj guh lo.

Ndaej cunghyangh doengzeiq, Veiz Gozcingh caeuq Vei Youcu、Ciuh Hungzgvangh song boux Gwzcouz siujcuj neix ndwen 5 ngoenz 29 bae Baekging gyoeblwnh hong.

(caengz sat)