Sai: Byaek hab gai mbouj gai

Diuh nanz lai goj ienq

Miz youzdaeng mbouj diemj

Cuengq nanz bienq raemxsaw

Daiq ngaenz yaek daeuj cawx

Gaej naeuz sawq mwngz gvai

Byaek hab gai mbouj gai

Diuh nanz lai goj ienq

Mbouj rox giuj anbaiz

Nuengx gaej gai deng cienh

Miz youzdaeng mbouj diemj

Cuengq nanz bienq raemxsaw

Mbwk: Bineix mak loq bek(lai)

Nyenye giet dawz rim

Da yawj bak caiq cimz

Gaej limzseiz(laemzseiz) cij aeu

Roeg mbin raq dem raq

Daeuj gvaengxgvax mbouj lek

Bineix mak loq bek

Nyenye giet dawz rim

Gaenq gangj gyaq ndaej ndei

Mbangj seiz soengq daxgimx

Da yawj bak caiq cimz

Gaej limzseiz cij aeu

Sai: Faenh raeuz saed hab’eiq

Dangq bae ndoeng raen gim

Siengj caeuq mwngz gyausim

Ndaej lingxcingz mbouj nuengx

Doengh ngoenzneix doxnyangz

(doxroeb)

Dangq nuengx raennaj beix

Faenh raeuz saed hab’eiq

Dangq bae ndoeng raen gim

Youq ndawsim gag gyaez

Gou mbouj ndaej diem din

Siengj caeuq mwngz gyausim

Ndaej lingxcingz mbouj nuengx

Mbwk:Cungj mbouj caengz raennaj

Gag boux gah(gag) mbiengjmbwn

Sawqmwh baenzneix un

Rox sim mwngz baenzlawz

Aeu diet bae duk gim

Gak aek in gou ga

Cungj mbouj caengz raennaj

Gag boux gah mbiengjmbwn

Dangq seizdoeng duzgoep

Nuengx neix roeb raen mwngz

Sawqmwh baenzneix un

Rox sim mwngz baenzlawz (it)