(ciep geiz gonq)

Gou aeu fwngz menhmenh lumh aenmbaq daeg iq neix, de cij rox gou mboujdanh nai de, vanzlij ndwn youq mbiengj de, de cij simdingh roengz- daeuj.

Gou riunyum cam daeg iq: “Ranz mwngz youq mbanj lawz ?”

“Ranz gou youq Mbanjnazmax.” Daeg iq han naeuz.

“Ranz de dwg mbanj lawz? De heuh coh gijmaz?” Gou vix daeg iq cam Lij Gyangz.

“Gou mbouj rox ranz de dwg mbanj lawz, hix mbouj geiq ndaej de heuh maz coh lo?” Lij Gyangz gangj dwk naj hoengzhwdhwd……

“Mwngz moeb de?” Gou cam Lij Gyangz.

“De ciq cib maenzngaenz gou, baenznanz cungj mbouj dwen boiz gou, lij bak mengx dem …… gou baez ndatheiq couh……” De gangj daengz coenz vah neix seiz, ndawsim miz di vueng lo.

“Mbouj dwg, de gangjgyaj! Boux neix cienmonz haep vunz aeu cienz, gou hix ngaiz de haep gvaq ne !” Sing neix dwg sing boux hagseng haxbaenh bang Cangh lauxsae bae heuh Lij Gyangz haenx, gvaiq mboujndaej de hengzdoengh baenzneix cizgiz. Coenz vah neix youh sawj gyoengq hagseng lwnhfaenfaen……

“Mwngz gaej laih gou!” Lij Gyangz daengx da caengz daeg neix, youh daengx da caengz daeg haenx, ndaw bak lij nambedbed dem, di ndeu hix mbouj fug.

Cangh lauxsae naeuz:“Lij Gyangz, geij gaenj, gawqyienz mwngz naeuz dwg bouxwnq laih mwngz, mwngz couh menhmenh lwnh gienhsaeh ginggvaq hawj gou nyi, gou itdingh goengbingz gaijgez ndei bae.”

“Gou caen mbouj gangjgyaj, dwg haujlai nanz gaxgonq lo……” Lij Gyangz mbouj fug naeuz, hoeng, yawj ndaej ok de miz di simvueng lo.

“Haujlai nanz? Dauqdaej dwg seizlawz? Youq gizlawz ciq cienz hawj de? Miz bouxlawz ndaej raen, bang mwngz guh cwngmingz lwi?”

“Mwh haenx dwg gou dog seiq nienzgaep seizhaenx lo. Mbouj miz saek boux raen……gou hix mbouj geiq ndaej youq gizlawz lo……” De yied gangj naj yied hoengz……

“Mwh haenx dwg youq byongh- roen dauqranz haenx……dwg haemh- lwenz gou raen daxboh de soengq cienz hawj de seiz, cij fwt siengj daengz de ciq ngaenz gou gvaq……” Lij Gyangz gangj le youh bouj gangj.

“O, sou mbouj caemh mbanj ndeu, mwngz vanzlij rox daxboh de dem? Yienghneix daxboh de heuh maz coh ni? Gou yaep ndeu dwk dienhvah hawj daxboh de yawjyawj sou dwg mbouj dwg caencik cij ndaej bw!” Cangh lauxsae naeuz.

“Lauxsae, gij neix gou…… mbouj rox ……hix mbouj dwg……”

“Lauxsae, de gangjgyaj! Gou cungj mbouj rox ranz de youq gizlawz, hix mbouj roxnaj de. Gou dwg aen haggeiz neix ngamq cienjhag gvaq- daeuj. Ranz gou gyae, daj haihag couh youq ndaw hagdangz gwnninz, moix daengz singhgiz haj, daxboh gou cij daeuj ciep gou dauqranz, gou soqlaiz cungj mbouj gag bouxdog byaij baema gvaq, engq mbouj ndaej youq byonghloh bungz de ciq cienz gvaq.” Vangz Siuh gangj dwk, youh yaek daej hwnjdaeuj, gyoengq doengzhag cungj gig doengzcingz de, nai de mbouj dingz.

“Daeg neix caen dwg boux lauxsaed daihdamj youh dwggyaez ndeu ha!” Cangh lauxsae daj ndawsim haenh Vangz Siuh boux hagseng iq neix, caemh caiq daj gij vah neix sawj gienh saeh neix menhmenh “raemx hawq raen rin”, menhmenh cingcuj hwnjdauj lo.

“Lij Gyangz, gou cam mwngz, vuenh daeuj gangj, mwngz bonjfaenh gamj caeuq boux vunz mwngz mbouj roxnaj caemhcaiq nienzgeij youh beij mwngz hung haenx ciq cienz gvaq lwi? ” Cangh lauxsae unqsunh dwk cam Lij Gyangz.

“Mwngz yawj doiqda lauxsae daeuj, seizneix, ndaej gangj vahcaen caengz?”Cangh lauxsae nyinhcaen youh yiemzsuk doiq Lij Gyangz naeuz.

“Suenq lo! Mwngz siengj laihdai mbouj boiz gou couh suenq lo! Seizneix gou mbouj aeu mwngz boiz lo, ndaej caengz ? Baihlaeng gaej gangj gou haep mwngz aeu cienz lobw! Hw!” Seizneix, Lij Gyangz doiq Vangz Siuh hozndat hemq dwk, song da mbouj gamj yawj lauxsae, hix mbouj gamj yawj doengzhag seiqhenz.

“Faex aeu naeng, vunz aeu naj”. Cangh lauxsae rox daengz, seizneix Lij Gyangz gaenq miz sim nyinhloeng gaij ndei, hoeng de youq dangqnaj vunzlai mbouj ndei gangj okbak……siengj daengz neix, Cangh lauxsae couh song mbiengj gen gak got Vangh Siuh caeuq Lij Gyangz song boux byaij ok ndaw doihvunz, coh bangunghsiz byaij bae……

(sat)