2035 nienz 10 nyied l hauh, dwg saedceij gou ciuhvunz nanzlumz haenx. Aenvih youq ngoenzhaenx, gou dauq- daej caeuq gyoengq doengzhag doxbiek ngeihcib bi haenx doxraen lo.

Daj ciep ndaej siusik doengzhag doxcomz le, gou couh gikdoengh ndaej laebdaeb geij ngoenz ninz mbouj ndaek, maqmuengh vaiqdi ndaej caeuq gyoengq doengzhag seiziq doxraen.

Ngoenzhaenx lajbyonghngoenz, gou daj Namzningz ma daengz Vanz- gyangh le, couh gipmuengz byaij bae coh Nanzgyangh Binhgvanj. Gou ngamq byaij haeuj aending haihoih ndaw binhgvanj bae, boux doengzhag ndeu sikhaek buet gvaqdaeuj, yiedcingz caeuq gou gaemfwngz camndei. Neix dwg dou doxbiek ngeihcib bi le baez daih’it doxraen, dou baenzlawz mbouj angq, mbouj gikdoengh ne？Gaenlaeng, gou hix angq dwk caeuq doengzhag wnq gaemfwngz cam ndei, ndaw ding haihoih cungj dwg sing riu sing gangjvah.

Youq raq youh raq sing bekfwngz ndawde, lauxsae seiziq dou cingsaenz gvaekgvaek byaij haeuj ndaw ding daeuj, gyoengq doengzhag angqfwng- fwng caeuq lauxsae gaemfwngz, doxgot camndei. Gou yawjraen mbangj boux doengzhag ndaw lwgda cungj aeng miz raemxda, couh lumj lwgnyez haujlai nanz cij caeuq bohmeh doxraen ityiengh, cungj cingzgingj neix saedcaih gamjdoengh vunz ha！Engq hawj gou gamjdoengh dwg, gvaq ngeihcib bi le, banhcujyin Veiz lauxsae lij cingcuj heuh ok aencoh dou daeuj！ Gou siengj：Neix mbouj dan dwg Veiz lauxsae geiqsingq ndei, canzlij dwg de gvansim dou, ciengzseiz dawz dou cuengq youq ndawsim bw！

Ciepdwk, gyoengq doengzhag baenz boux baenz boux yiengq daihgya gaisau swhgeij. Gyoengqde mizmbangj dang canghyw, mizmbangj dang gingjcaz, mizmbangj dang lauxsae, mizmbangj dwg giyezgyah…… Dingq sat gyoengq doengzhag gaisau le, Veiz lauxsae lumj daxboh unqswnh dwg- gyaez nei doiq dou naeuz：“Sou youq aen nienzgeij neix, baihgwnz miz bouxlaux, baihlaj miz lwgnyez, daihgya itdingh aeu haeujsim ndangdaej, aeu ciuqgoq ndei song mbiengj bohmeh, engq aeu gyauyuz ndei lwg swhgeij, maqmuengh sou roengzrengz gungh- coz, vih guekcoj lai guh gungyen. Hoh sou ndangdaej ndei, ndawranz vuenyungz, gunghcoz guh ndaej swnh.” Dingq gij vah Veiz lauxsae gangj haenx, gyoengq doengzhag cungj gamjdoengh dwk raemxda lae lo……

Doxraen seizgan gig dinj, dou youh doxbiek lo. Baez doengzhag doxraen neix hawj gou gig nanz lumz, maqmuengh mbouj geij nanz dou caiq doxraen.（指导老师：覃寒春）