2014 nienz 10 nyied 25 hauh, gou caeuq doengzdoih gou Lij Yungzyungz caez naengh banci bae Namzningz camgya Daengx Gih Daihsam Gaiq Siujhagseng Yungh Byauhcunj Vahcuengh Doxdax Gangj Goj.Youq gwnz loh, yawj rog ci, gofaex mwncup heuswd, va hai hoengzhoengz henjhenj, rumz ci daiq daeuj gij heiq va homfwdfwd, hawj vunz sim sangj raixcaix.

Dou daeujdaengz Namzningz, ra ndei diegyouq le, couh bae caeuciem lo. Gou ndawsim gouz: Caeu ndaej ciem ndei di ba. Siengj mbouj daengz, caeu ndaej ciem daihsam. Gou doeksaet lo, sim siengj: Daihsam hix daiq gonq luba! Doeklaeng siengj- siengj, lau gijmaz, gou gaenq lienh gangj ndaej gig sug lo, cijaeu sim mbouj vueng couh itdingh gangj ndaej ndei.

Ngoenz daihngeih banhaet 8 diemj cung, dou daeujdaengz aending hung doxdax. Ndaw ding gaenq miz haujlai senjsouj youq gizhaenx lo, mizmbangj gangj riu, mizmbangj cang ndang, lij mizmbangj gaenjcieng ndaej byaij bae byaij dauq. Gvaq yaep ndeu, doxdax hainduj lo, daih’it boux senjsouj hwnjdaiz lo, de geijlai gaenj- cieng ha, naj cungj mbouj riu. Seizneix, gou siengj hwnj bingzseiz lauxsae sinhoj son gou, gou haenq- rengz bae lienh gangj, gou couh laeglemx hawj swhgeij dajheiq:“Veiz Feihyangz, mwngz itdingh ndaej!” Daengz gou hwnjdaiz lo, gou sup gaemz heiq ndeu, caemdingh dwk gangj aen goj 《Gorungz Iq Ra Ranz》, gou nyinhcaen gangj dwk, roxnyinh swhgeij hix bienqbaenz gorungz iq lo, gorungz iq daej, gou hix daej, gorungz iq angqvau, gou hix gaen angqvau. Aen goj gou gangj sat lo, laj daiz raq sing bekfwngz yiengjhoho, gyoengq bingzveij hix doiq gou yaengx hwnj fwngzmeh, gou sim’angq raixcaix.

Doxdax sat lo, gou ndaej it daengj ciengj, doengzdoih gou Lij Yungz- yungz ndaej ngeih daengj ciengj. Gou gig miznaj dwk hwnjdaiz bae lingx ciengj, bouxlingjdauj fat ciengj hawj gou seiz, gou gikdoengh ndaej mbouj rox gangj gijmaz, cijdwg amqamq lwnh swhgeij:“Veiz Feihyangz, mwngz ndaej cwngzgungh lo, mwngz mbouj hawj lauxsae saetmuengh!”

Ngoenz daihsam, dou daiq gij cingzcik ndei angqvauvau dwk naengh ci dauqma lo. Baez neix doxdax, gou rox ndaej daengz: Cijaeu roengzrengz, couh itdingh guh ndaej daengz.

（指导老师：韦彩芳）