Daxmeh gou vih ndaw ranz causim gig lai.

Daxmeh gou gig gaenx, ngoenznaengz guhhong ciengz- ciengz dwg haetromh okbae mbwnlaep cij dauqma, haetromh guhhong gaxgonq caeuq haemh- laep ma ranz le, lij cawj haeux cawj byaek hawj dou gwn. Mwh gwn haeux, daxmeh cungj mbouj nip noh gwn, caj dou gwn lw le de cij gwn. Daxmeh naeuz：Sou lwgnyez gwn noh maj ndangdaej, gou laux lo, mbouj maj lo, gwn noh hix mbouj miz yungh.

Mwh gou gouj bi, daxmeh aenvih ga in haeuj yihyen. Canghyw naeuz：“Guhhong daih lai lo, ga deng sieng, aeu guh soujsuz cij ndaej.” Gou dingqnyi le, ndoj youq ndaw gungx caegcaeg daej hwnjdaeuj……

Mwh daxmeh okyen, canghyw naeuz：“Ma ranz mbouj ndaej guhhong naek, moix cou cungj aeu daeuj yihyen genjcaz.”Hoeng, ma ranz le、 daxmeh ciuqyiengh bae guhhong.

Daxmeh moix baez bae yihyen genjcaz, cungj bae Sinhvaz Suhden cawx gij saw gou maij haenx ma hawj gou. Miz haemh ndeu, gou byaij gvaq aen rug bohmeh, dingqnyi gij sing daxboh caeuq daxmeh gangjvah. “Mwngz cungj mbaet ngaenz roengzdaeuj hawj dahlwg cawx saw, mwngz dengsieng cungj caengz ndei, mwngz hix aeu vih swhgeij siengjsiengj, hawj bonjfaenh boujbouj yingz- yangj!”

Daxmeh cix naeuz：“Vih dahlwg gou gvaq ndaej ndei, gou baenzlawz hoj cungj mbouj youqgaenj, cijaeu dahlwg gvaq ndaej ndei, gvaq ndaej vaiqvued, gou couh angq lo!”Dingq daengz gij vah neix, gou nyaenx mbouj ndaej raemxda doekbyoegbyoeg……

Gou caegcaeg roengz gietsim, gou yaek roengzrengz bae doegsaw, guh boux lwgnyez dingqvah ndeu, mbouj hawj bohmeh causim.

（指导老师：韦华勤）