De ciengz bae gunghcangj、hag- dangz ngonzcaz, ciepraen gij ganbu dingjrengz “cojgingj” bingdoih haenx caeuq gij daibyauj song baij, camgya hoihcomz vunzlai, iugouz gij cujciz gwzming vunzcungq song baij doxgiet hwnjdaeuj, lai gag bihbingz, mbouj ndaej hoenxdaeuq. Iugouz gij bingmax dingjrengz “cojgingj” haenx, gaej faenbaij faenbang, lai guh gij hong lienzhab、doxgiet vunzlai haenx. Iugouz gij goengdaeuz diegfueng, byawz gaenq ok danvih nei cix dauqbae danvih, gij ganbu miz mboujdoengz gvanhdenj haenx, raeuz aeu baujcingq gyoengqde ancienz, mboujcinj seizbienh saeujranz、gaeb vunz、dub vunz caeuq coujnaj vunz.

De iugouz gij cujciz vunzcungq song baij siucawz baijsingq, aen danvih lawz song baij ndaej daih- lienzhab nei, de cix caeuq gij goengdaeuz cujsaeq bwhguh wnq caez bae angqhoh, dingjrengz gyoengqde.

Miz mbangj diegfueng youh dauqcungz hoenxdaeuq、luenh gangj vunzsienh、dingjcung bingdoih、ciengjduet cungqbauq, Veiz Gozcingh gig yousim gij saeh neix. Miz baez ndeu cujsaeq bwhguh hai baez hoih dingq gyoeblwnh cingzgvang swngh- canj ndeu, miz vunz bauqnaeuz, dieg ndeu youh luenh gaj vunz lo. Veiz Gozcingh hozndat raixcaix, de naeuz: “Loengh gijmaz fangz ne, gaenq fat haujlai vwnzgen roengzbae gvaq, lij ceihdingh mbouj ndaej?” De heuh misuh Yangz Cunghdangz ra gij vwnzgen doenghbaez fat roengzbae haenx okdaeuj, youq gwnz hoih doeg le gij biudaez caeuq ngoenzgeiz roengzfat. Ciuq gij eiqsei de, cujsaeq bwhguh caeuq Gvangjsih Ginhgih youh doxgap fat le aen doengcei ceihdingz luenh gaj vunz ndeu. Ciuq gyonjgeiq, daj bi 1967 ndwen 11 laebbaenz Cujsaeq Bwhguh Gwzming Guengjsae le daengz bi 1968 ndwen 6, 7 ndwen neix cujsaeq bwhguh caeuq Gvangjsih Ginhgih couh doxgap fat le 13 aen vwnzgen gvendaengz ceihdingz luenh gaj vunz、luenh gaeb vunz caeuq ceihdingz hoenxdaeuq、ceihdingz ciengjduet cungqbauq yinzminz gaij- fangginh haenx.(caengz sat)