“Ling ling ling...... ”

Roengzdangz lo, Cangh lauxsae siengj dawz gij cozyez hagseng ban de bae fat hawj daihgya, ngamq byaij daengz bakdou bangunghsiz, couh cadi caeuq boux hagseng iq ndeu doxbungq. Cangh lauxsae baez doeksaek yat, bengda sijsaeq yawj, cij raen boux hagseng iq neix vuet raemxda daejswdswd.

“Lauxsae, gou ngaiz boux roek nienzgaep ndeu dawz aeu cienz, lij ngaiz de moeb dem, w w w ……” Lij caengz caj Cangh lauxsae hai bak, de couh daejswdswd gauq vah bauqsoq lo.

“Mwngz dwg ban lawz? Coh heuh gijmaz, vihmaz ngaiz de moeb ni? Menhmenh lwnh gou nyi. ” Yawj boux hagseng iq neix daej baenz yiengh- neix, siengj daengz ndaw hagdangz fatseng cungj saeh neix, Cangh lauxsae gig hozndat, hix gig sim’in boux hagseng iq neix, de daiq boux hagseng iq neix haeuj naj daiz- banhgoeng daeuj, cuengq dab cozyez roengz gwnzdaiz bae le cij sijsaeq dingq boux hagseng iq neix lwnhgangj.

“Gou dwg sam nienzgaep ngeih ban, heuh guh Vangz Siuh, haxbaenh ngamq roengzdangz, miz boux roek nienzgaep ndeu dajlaih naeuz gou yiemq de cib maenz ngaenz, haep gou boiz cienz hawj de. Gou naeuz gou mbouj caeuq de ciq cienz gvaq, de couh aeu gaemgienz moeb gou,w w w……”

“Mwngz rox de youq ban lawz, heuh gijmaz coh lwi?” Yawj de daej baenzneix siengsim, Cangh lauxsae engq siengj sikhaek ra boux hangz vunz haenx daeuj lo .

Vangz Siuh baez raen miz vunz haeujsim gij saeh de, de ndawsim gamjdaengz miz muengh lo, sawqmwh singdaej engq hung lo. Yawj ndaej ok, seizneix de rox gig gwnvei……

“Gou soqlaiz cungj mbouj roxnaj de, engq mbouj gamj caeuq de ciq ngaenz, seizneix, gou cij rox de dwg boux hagseng roek nienzgaep ndeu.” Vangz Siuh doq vut raemxda doq dap naeuz.

“Lauxsae, gou roxnaj de, gou bae heuh de daeuj neix, ndei lwi?” Miz boux hagseng youq henz caeuq Vangz Siuh nienzgeij ca mbouj geijlai ndeu singhung naeuz. Gijneix caen ndei ha, Cangh lauxsae sikhaek hawj de bae ra daeg hangz vunz aeu ngaenz haenx daeuj.

Yaep ndeu, cij raen boux hagseng haenx bouxdog buet dauqma, de baegfofo coh Cangh lauxsae naeuz:“Lauxsae, gou heuh mbouj ndaej de, baenzlawz heuh de cungj mbouj haengj daeuj.”

Cangh lauxsae haenh boux hagseng neix naeuz: “Mwngz baenz iq cungj gamj bae heuh bouxhung, caen dwg boux simndei ndeu, engq dwg boux daihdamj ndeu. Yienghneix, mwngz daiq gou bae ra de ba. ”

Daeg haenx raen Cangh lauxsae roengz laeuz le, couh miz di simvueng lo, de siengj buet deuz, hoeng ngaiz geij boux hagseng youq henz haenx hemq dwk:“Couh dwg de lo! Gaej siengj deuz bae lo!”

Daeg neix baez doeksaet yat, couh dingz din roengzdaeuj, ngaem gyaeuj dinghdingh ndwn dwk. Caj Cangh lauxsae byaij daengz dangqnaj de, de aenda baenqlulu, lumj yaek siengj gangj saeh gijmaz nei.

“Ndaek vunzrwix mwngz lij ndwn youq neix ha? Mbouj vaiq di gvaqdaeuj yiengq lauxsae nyinh- loek?” Lij caengz caj Cangh lauxsae hai bak gangj vah, boux hagseng haxbaenh bae heuh mbouj ndaej de haenx gyaegyae couh hujdengdeng hat naeuz, gwnz naj lij miz di daekeiq dem.

Seizhaenx miz haujlai hagseng comz gvaqdaeuj yawj nauhyied, boux- boux cungj mwngz coenz gou coenz lwnhsubsub hwnjdaeuj……cungj yawj Cangh lauxsae baenzlaw cawqceq saeh neix. Ndawde miz haujlai boux vanzlij caengz hozroengz dem——yawj daeuj, daeg neix caen mbouj dwg boux ndei gyawz bae bw.

“Mwngz dwg ban lawz? Heuh gijmaz coh ?” Cangh lauxsae cam de .

“Gou dwg roek sam ban, heuh guh Lij Gyangz. Lauxsae, mwngz daiq de daeuj neix, caen ndei lai lo, gou muengh mwngz bang gou heuh de boiz cienz gou bw! Hehe……” Lij Gyangz doiqda baenqlulu gangj naeuz. De laihnauz Cangh lauxsae lumj mbouj miz saek di beizheiq nei, couh hihi haha caeuq Cangh lauxsae doq gangj doq riu hwnjdaeuj.

“W, mwngz caen coengmingz! Gou couh dwg daeuj bang mwngz gaijgez vwndiz lo!” Cangh lauxsae riunyumnyum dwk han naeuz.

“Hoeng, miz aen diuzgen ndeu, mwngz itdingh dapwngq gou cijndaej bw!” Cangh lauxsae naeuz.

“W! Gou itdingh guh daengz! Docih lauxsae!” Lij Gyangz lumj ra ndaej boux baengh ndeu nei, gig hingzsaenz.

Seizneix, gyoengq hagseng cungj yawj Cangh lauxsae, geizheih dangq- maz.Vangz Siuh yawjyawj Cangh lauxsae, raemxda rim gvaengzda, youh siengj daej hwnjdaeuj lo……

(caengz sat)