Cinz Yenz dwg doengzhag ban gou, de mbouj suenq sang, byoemgyaeuj youh ndaem youh noengq, doiq da luenzlulu, cinglingz youh ndeigyaez, de gig haengj bang vunz.

Miz ngoenz ndeu, lwnz daengz siujcuj dou baet dieg. Ngoenzhaenx cingq doek fwn iq, gou caeuq geij boux doengzhag youq ndaw fwn baet mbawfaex nanwt haenx, miz di dwgrengz. Gou mbouj miz liengj, byoemgyaeuj caeuq buhvaq dumz liux lo. Cinz Yenz raen lo, couh byaij daengz dangnaj gou, gvansim dwk gangj:“Siujcingh, buhvaq mwngz cungj dumz lo, gou daeuj bang mwngz baet, dou vaiqdi baet nyapnyaj seuq bae.” Gangj sat, de couh dawz sauqbaet baet hwnjdaeuj. Miz de bang gou baet, dieg haemq vaiq couh baet seuq lo.

Lij miz baez ndeu haetromh, gou caeuq Cinz Yenz daeujdaengz hagdangz, ngamq haeuj bakdou hagdangz, couh yawjraen gwnz cauhcangz miz haujlai vunz humx youq giz ndeu, mbouj rox fatseng gijmaz saeh. Dou song boux couh buet gvaqbae yawj, yienzlaiz dwg boux doengzhag iq ndeu deng laemx, lwgdin ok lwed lo. Cinz Yenz sikhaek daj ndaw daehsaw dawz ok bau ceij ndeu, gangj: “Daegnuengx, hawj gou yawjyawj.” De bang doengzhag iq uet lwed seuq le, gipmuengz aemq de bae yihyen. Lwgdin boux doengzhag iq dwk yw bau ndei le, Cinz Yenz youh aemq doengzhag iq ma hagdangz, de baeg ndaej ok hanh lo, de hix mbouj gangj gijmaz.

Cinz Yenz couhdwg yiengh- neix haengj bang vunz, ndawsim gou gig boiqfuk de, gou aeu yiengq de hagsib.（指导教师：韦志略）