Ranz daxbuz miz duz meuz ndeu, gig dwggyaez, moix baez gou bae ranz daxbuz, cungj caeuq duzmeuz guh- caemz.

Duzmeuz dwggyaez neix, daengx ndang bwn henjrwg unqnemnem, seiq cik din cix dwg bwn hau, doiq da youh luenz youh ndongq, ndaemliklik, aenndaeng iqet luenzli gig ndeigyaez, mumhhau gwnz naj, gaeb ndaej duznou seiz, couh daengj hwnjdaeuj, aenbak lumj bakguk ityiengh, fouqheuj raeh raixcaix. Nyauj duzmeuz soemswt, duzmeuz baez nyauj daengz vunz, couh sikhaek louz miz geij diuz rizhoengz. Duzmeuz moix cik daejdin cungj miz nohdemh, byaij loh seiz mbouj ok saekdi sing. Diuzrieng de youh co youh raez, duzmeuz baez buet, diuzrieng couh daengj hwnj sangvid.

Gou ceiq gyaez yawj duzmeuz saj binghbanghgiuz. Gou baez raen duz- meuz, couh dawz binghbanghgiuz okdaeuj hawj de saj, gou cuengq binghbanghgiuz youq gwnz dieg, duzmeuz yungh song cik nyaujnaj bae dik binghbanghgiuz, binghbanghgiuz couh ringx deuz, duzmeuz ganjvaiq gyaep gvaqbae, hoeng, binghbanghgiuz mbouj dingq vah, lij ringx bae naj mbouj dingz. Caj duzmeuz gyaep daengz, yungh rengz baez bungq, binghbanghgiuz youh danh hwnjdaeuj, duzmeuz youh bae gyaep. Couh yienghneix, duzmeuz saj bingh- banghgiuz cungj dingz mbouj roengzdaeuj, geijlai mizyinx ha, daeuq ndaej gou riu dwk dungx cungj in lo.

Duz meuz neix caen dwggyaez, de daiq hawj gou haujlai angqyangz!

（指导老师：覃珍团）