Lij Mingz doengzhag:

Mwngz ndei!

Gou gig angq ngoenzneix sij saenq hawj mwngz, mwngz yawj daengz fung saenq neix seiz, itdingh roxnyinh gig geizheih: Vih maz sij saenq hawj gou ne? Baihlaj dingq gou gangj, mwngz couh rox vih gijmaz saeh lo.

Gou dwg boux lwgnyez hailangh daihfueng coengmingz dwggyaez ndeu, gou gyaez ciengqgo, gyaez vehveh, gyaez bang vunz, daihgya cungj gyaez caeuq gou guhcaemz.

Hagdangz dou seizneix cingq gawjhengz aen hozdung caeuq gizgyae siuj baengzyoux “fwngz gaem fwngz”, gojyij doenggvaq gak cungj fuengfap roxnaj siuj hagseng ndawsingz lajmbanj Baihsae Digih, caemhcaiq gapbaenz baengzyoux ndei , gojyij doenggvaq sij saenq、hwnjvangj daengj fuengfap daeuj gyauhliuz hagsib sinhdwz、saeh mizyinx daengj. Ngoenzneix gou sij saenq hawj mwngz, couhdwg aen muzdiz neix. Gou maqmuengh raeuz baenz baengzyoux ndei le, daengzcog couh gojyij dox bangcoh dox gvansim, gou miz maz mbouj rox mwngz gojyij son gou, mwngz miz maz gunnanz gou couh bang mwngz, neix dwg geijlai ndei ha !

Raeuz yienznaeuz gek youq mbiengj mbwn ndeu, danhseih raeuz doengz majhung youq baihlaj aen mbwnlamz ndeu. Gou maqmuengh caeuq mwngz “fwngz gaem fwngz” baenz baengzyoux ndei, doxcaez hagsib, doxcaez cinbu, doxcaez majhung, mwngz gangj ndei lwi?

Doeklaeng hoh mwngz hagsib cinbu, ndangdaej ndei!

Baengzyoux mwngz:

Cinz Caijhungz

2014. 12. 25

（指导老师：郑振常）