Duzlingz iq caeuq daxmeh youq ndaw ndoengfaex gwnz ndoi, ngoenz- naengz ra gwn guhcaemz, swxyouz swxcaih.

Ngoenz ndeu, duzlingz iq cam daxmeh:“Daxmeh, aenndoeng miz bien lwi?” Daxmeh naeuz: “Dinndoi couhdwg bien ndoih lo.” Duzlingz iq youh cam:“Rog ndoeng baenzlawz yiengh ne?” Daxmeh naeuz: “Laj ndoi, bouxvunz hai naz caux reih, youq ndaw naz ndaw reih ndaem le haulaij doenghgo. Seizneix, haeuxyangz gaenq maj baenz lo, aen’aen bongqbebe, youh diemz youh rang ne.”

Duzlingz iq caengz ndaej gwn gvaq haeuxyangz, de cam: “Haeuxyangz dwg baenzlawz yiengh ha? Lumj mak- dauz roxnaeuz makgyoij?” Daxmeh naeuz:“Cungj mbouj lumj, go de daengjsoh, lumj song sam duz lingz sang, giet aen youq bangx gyang. Aen haeuxyangz miz byak suek dwk, gwnz dingj lij miz nyaep mumh ndeu.” “Haeuxyangz geijlai saenzgeiz ha!”Duzlingz iq naemj ha naemj, de baenzlawz siengj hix siengj mbouj ok haeuxyangz dauqdaej baenzlawz rang baenzlawz diemz. De ndwnj gaemz myaiz ndeu, ngaeq daxmeh daiq de bae mbaet haeuxyangz. Daxmeh mbouj miz banhfap, cijndei han lo, naeuz:“Bae caemh ndaej, hoeng, itdingh aeu dingq gangj, cij hawj mbaet aen ndeu, mbaet le couh buet dauqma, mboujne hawj vunz gaeb bae couh dai lo.”

Banhaemh duzlingz iq gaen daxmeh roengz ndoi, daeujdaengz henz reih haeuxyangz, swnh bouxvunz baema gwn caeuz caengz dauq, cung hwnjbae duz mbaet aen haeuxyangz ndeu, couh sikhaek buet dauqma gwnz ndoi.

Duzlingz iq gwn haeuxyangz. A, youh rang youh diemz! De gwn sat le lij siengj caiq gwn dem.

Haemh neix songde youh daeuj mbaet haeuxyangz lo, lij ciuqyiengh mbouj miz saek boux vunz. Duzlingz iq ndawsim gag naemj:“Daxmeh gag lau dai, gizlawz miz vunz ha? Gou aeu lai mbaet di baema cij ndaej.”

Duzlingz iq yaengx fwngz gvaz mbaet aen haeuxyangz ndeu, youh yaengx fwngz swix mbaet aen haeuxyangz ndeu. De yaek mbaet aen daihsam, hoeng, fwngz mbouj ndaej hoengq lo, baenzlawz guh ha? De dawz haeuxyangz geb youq lajeiq, youh caiq yaengx fwngz bae mbaet haeuxyangz. Hoeng, de baez yaengx fwngz, aen haeuxyangz lajeiq couh “bug” sing ndeu doek gwnz namh bae. Hoeng, duzlingz iq cij goq yaengx fwngz mbaet, mbouj goq aen doek namh. Yienghneix, de mbaet le youh geb, geb le youh mbaet……

Daxmeh mbaet ndaej aen haeux- yangz ndeu couh buet. De buet ha buet ha, mbouj raen duzlingz iq, laihnaeuz de gaenq baema ranz lo. Daxmeh daengz ranz le, lij mbouj raen duzlingz iq, couh gipmuengz buet dauqma yawj.

Daxmeh daengz henz reih baez yawj, cij raen duzlingz iq lij haenqrengz mbaet haeuxyangz, baenz benq reih gwnz namh cungj dwg haeuxyangz doek.

Cingqngamj seizneix, miz vunz daeuj lo. Daxmeh simgip dangq feiz remj, swenjyauyau hwnjdaeuj. Duz- lingz iq baez dingq, gaem aen haeuxyangz ndaw fwngz, vaiqvat couh buet hwnj ndoi.

Duzlingz iq sai le baenz lai seizgan, mbaet baenz lai haeuxyangz, hoeng, mbouj rox rom ndei cang ndei, dauqdaej hix cij ndaej aen haeuxyangz ndeu dauqma ranz, geijlai hojsik ha!

(Ganh Sozvwnz/甘说文)