Veiz Gozcingh mbouj ndaej gaemgienz gaenh baenz bi le, seizneix ndaej dauqcungz okdaeuj gaemgienz dem, yienznaeuz de laemxsim yaek guh ndaej hong song baij, siucawz doxdingj, siengj caenhvaiq hawj gwnzbiengz ndaej onjdingh, mbefat swnghcanj, hoeng, aenvih gij loekloeng “swix” sonyinx “vwnzgwz” haenx caengz ndaej gaijbienq, vanzlij gig hoj guh hong.

De baez ma daengz Namzningz cix ngoenz lienz haemh dwk caeuq gij vunz cujsaeq bwhguh wnq doengzcaez, cawjleix Guengjsae nauh “vwnzgwz” seiz gak cungj mauzdun fukcab haenx, daegbied aeu gaijgez song baij doxdingj gij vwndiz neix. De cawjleix vwndiz gij iugouz caeuq gij yenzcwz dwg, ciuq gij eiqsei cunghyangh song baij haengjdingh cungj dwg cujciz vunzcungq gwzming, youj bingz vanj raemx ndeu.

Song baij cujciz, mboujlwnh dwg gij dingjrengz gvaq de haenx roxnaeuz dwg gij fanjdui gvaq de haenx, de cungj bae guh hong gyoengqde, coengzlaiz mbouj haemz gij saeh baedaeuq de gaxgonq haenx. Mbangj bouxdaeuz cujciz vunzcungq guh genjdauj hawj de, naeuz doenghbaez baedaeuq de loek lo, de cungj dwg riuriu cix sat le, caemhcaiq daj daengxbuenz Guengjsae bae naemj, haeujsim guh ndei gij hong swhsiengj gyoengqde.

De ciengzseiz caeuq gij dungzci gaemhong siujcuj bwhguh wnq bae ciepraen gij bouxdaeuz song baij, heuh gyoengqde goq daengz buenz- hung, souj ndei hezyi, dingzsat hoenxdaeuq. Byawz souj ndei hezyi ne, couh haengjdingh caeuq biuj- yiengz; byawz guh loek ne, couh yiemzsuk bihbingz; byawz swhsiengj mbouj doeng nei, couh naihsim son- gyauq gangjfug de.(caengz sat)

□ Hoz Saubangj sij Cinz Siengzcouh Liuz Gingliuj Cinz Siengzgen hoiz