Yi Lanz nienznomj vunz gyaeu- ndei, de dayoz bizyez le youq lwgcaen gending cungsim guhhong. Cienz mbouj suenq lai, gvaq ndaej bae, hong mbouj suenq nyaengq, dwg faenh hong cwxcaih ndeu, Yi Lanz gig muenxcuk hix gig gaenxguh.

“Dingling……” Soujgih yiengj hwnjdaeuj, mbouj yungh yawj de hix rox dwg bouxyoux dwk daeuj, diemj cung ndawde de gaenq dwk daeuj sam baez lo. Yi Lanz mbouj vueng mbouj muengz mbon ok soujgih, caen dwg bouxyoux dwk daeuj dahraix, de riunyumnyum, ndawsim cix ndaq naeuz: Duzfangz gip neix. Yi Lanz baez nyaenj soujgih, baihde couh dajciengj haibak:

“Vei, baujboiq, haeuxbyaek dingh ndei lo, mwngz caengz gvaq- daeuj ha?”

“Lij miz ngeihcib faencung cij daengz seiz roengzban ne.”

“Mbouj dwg ngeihcib faencung ma, mizmaz gaenjaeu? Youh mbouj miz byawz gam mwngz, vaiqdi gvaq- daeuj ba.”

“Yienznaeuz seizneix mbouj mizmaz hong guh lo, hoeng hix aeu cinjseiz hwnjban roengzban ya.”

“Caen dwg bouxvunz gaennyinz dog, duzvaiz lij rox ngengq gaeu bw, gvaqdaeuj vaiq di, gwn sat haeuxcaeuz raeuz aeu……”

“Deq gonq……”

Ngamq ciep sat dienhvah, dahsau iq roek caet bi ndeu byaij haeuj dou daeuj, dahsau iq ndaeng sang bak saeq, gyaeundei dwggyaez. De yiet gyaeuj yawj neix neix yawj haenx, yaek gangj youh mbouj gangj.

“Dahsau iq, yaek daengz seiz roengzban lo, mwngz mizmaz saeh?”

“Gou……gou……gou yaek guh gending lwgcaen.”

“Gending lwgcaen?” Yi Lanz da daengx bak aj, yawj gij yiengh dah iq mbouj dwg gangjriu bw.

Raen Yi lanz doeksaet, dah iq lienzmuengz naeuz:“Boh gou naeuz gou mbouj lumj de, de yaek caeuq meh gou lizvwnh.”

“Mbouj dwg bouxboux lwgnyez cungj maj ndaej lumj daxboh ne, miz mbangj lumj meh, miz mbangj lumj goengbuz, miz mbangj lumj dadaiq, gij yienghneix cungj gangj mbouj dingh.”

“Daxmeh gou hix yienghneix gangj, hoeng, daxboh gou cungj euq gij yienghde, itdingh aeu caeuq daxmeh lizvwnh, mwngz couh hawj gou guh gending ba, gou yaek hawj daxboh yawjyawj gou dwg mbouj dwg lwgcaen de. yienghneix de couh mbouj caeuq daxmeh lizvwnh lo.”

Yi Lanz dingq le, mbouj rox vihmaz, ndawda hamzraemx cam:“Byawz heuh mwngz daeuj neix?”

“Yawj densi rox.”

“Seizneix dwg seiz roengzban, mwh neix daxboh daxmeh ra mbouj raen mwngz couh simgaenj lo, mwngz baema ranz gonq, ndei lwi?”

“Mbouj! Gou yaek guh gending lwgcaen, gou hawj cienz hawj mwngz.” Gangj sat dahsau iq daj song aen daehbuh mbon ok song gaem ngaenz- soiq ndenq daengz dangqnaj Yi Lanz,“danghnaeuz mbouj gaeuq, gou heuh boh gou daeuj hai cienz, de miz cienz lai.”

Mbaw siengq song conq ndeu cab youq ndaw ngaenzsoiq, Yi Lanz geizheih dwk dawz daeuj yawj, mbouj yawj couh suenq lo, baez yawj de bak ajloengqloengq:“Neix dwg byawz?”

“Dwg daxboh gou, mwngz naeuz gou lumj daxboh lwi?” Dahsau iq da yaepbyabbyab yawj Yi Lanz, muengh Yi Lanz naeuz de lumj daxboh de.

Seizneix, Yi Lanz saeknaj heurwdrwd, mbouj rox baenzlawz guh, cix ngaek gyaeuj naeuz:“Lumj, mwmgz lumj daxboh, mwngz dwg lwgcaen daxboh mwngz.”

Dahsau iq baez dingq, angq dwk diuqyetyet, aennaj ronghrikrik lumj daengngoenz banringz nei, yaep ndeu, de cumh bak dwk naeuz:“Hoeng, daxboh mbouj saenq, gou lij aeu guh gending cij ndaej.”

Yi Lanz gig vaiq couh cingjleix ndei gij simcingz swhgeij, unqswnh dwk doiq dahsau iq naeuz:“Dahnax miz yiengh doxgaiq ndeu, ndaej heuh daxboh mwngz nyinh daengz mwngz couh dwg lwgcaen de.”

Yi Lanz gangj sat, byaij haeuj ndaw rug bae, dot aen goenhnyawh gwnz fwngz caeuq diuz soij gwnz hoz roengzdaeuj, cang roengz aen hab’iq gyaeundei ndeu bae, suek le caengz youh caengz, ndenq hawj dahsau iq, nyinhcaen dwk naeuz:“Mwngz dawz aen hab neix gyau hawj daxboh mwngz, de yawj le couh rox mwngz dwg lwgcaen de lo, de hix mbouj caeuq meh mwngz lizvwnh lo. Aen hab neix dwg bouxsien hawj gou, cij ndaej hawj daxboh mwngz yawj, mbouj ndaej hawj daxmeh mwngz yawj, mboujnex de couh mbouj lingz lo.”

Dah iq hainduj mbouj saenq, raen Yi Lanz gangj ndaej gig nyinhcaen, de buenq saenq buenq mbouj saenq dwk dawz aen hab’ iq dauqbae lo.

Dahsau iq ngamq okdou, soujgih Yi Lanz youh yiengj lo.Yi Lanz baez yawj, aennaj de nyaeuq geij mbat, saeknaj bienq heuyau.

“Baujboiq, vihmaz caengz daeuj ha? Gou siengj mwngz ne!”

“Baezlaeng mwngz gaej ra gou lo, mwngz caengz gietvaen bae gizlawz miz dahlwg haenx? Gij doxgaiq mwngz soengq gou haenx, gou gaenq gyau hawj dahlwg mwngz dawz dauqbae lo.” Yi Lanz gangj sat, sim de in lumj deng mid gvej nei, raemxda doek- byoebbyoeb.